Tarazda áiel uly qaiyrshylyqpen ainalysqany úshin jaýapqa tartyldy, dep habarlaidy dalanews.kz.
Kámeletke tolmaǵandardyń isteri jónindegi mamandandyrylǵan aýdanaralyq sot E.-ge qatysty isti qaraǵan. Ol bala tárbiesine qatysty mindetin tiisinshe oryndamaǵany úshin jaýapqa tartylǵan.
Sot málimetinshe, onyń kámeletke tolmaǵan uly Taraz qalasynda baǵdarsham mańynda júrgizýshilerden aqsha surap júrgen jerinen ustalǵan. Balanyń jasy 16-ǵa tolmaǵandyqtan, ákimshilik hattama anasyna rásimdelgen.
E. óz kinásin tolyq moiyndap, jasaǵan isine ókinish bildirgen.
Sot qaýlysymen E. kináli dep tanylyp, oǵan 60 myń teńge kóleminde aiyppul salyndy. Qaýly áli zańdy kúshine engen joq.
