Tanymal ánshi pandemıaǵa baılanysty úılerinde daýys berdi. Saılaý ýchaskesiniń qyzmetkerleri ánshiniń úıine kelip, búletenderin jáshikke salyp alyp ketti.
– Men Parlament Májilisi depýtattarynyń saılaýyna únemi qatysyp keldim. Bıyl biz úıde daýys beremiz. Pandemıaǵa baılanysty búgin saılaý ýchaskesiniń qyzmetkerleri úıge kelemiz dedi. Men kelisim berdim. Árkimniń kózqarasy ártúrli. Bul saıası pikirge de baılanysty. Ár adam saılaýda óziniń oıyn, pikirin jetkizedi. Bolashaqqa degen senimin jetkizedi, – dedi ánshi kompozıtor Eskendir Hasanǵalıev.
Onyń aıtýynsha, uly, respýblıkaǵa eńbegi sińgen qaıratker, P.Chaıkovksıı atyndaǵy Almaty mýzykalyq kolejiniń dırektory Birjan Hasanǵalıev qazir saılaý ýchaskeleriniń birine jetekshi etip bekitilgen. «Ol da balam úshin úlken jaýapkershilik ekeni ras. Tań atpaı turyp, sol aýqymdy mindetti atqarýǵa ketti» dedi E.Hasanǵalıev.
Aıta ketý kerek, 10 qańtarda QR Parlamenti Májilisi men Máslıhat depýtattaryn saılaý bastaldy. Almatyda 507 saılaý ýchaskesi tańǵy 07:00-den bastap ashyldy. Daýys berý oryndary «QR Saılaý týraly» zańynyń, Ortalyq saılaý komısıasynyń talaptaryna saı keledi. 507 ýchaskede 2535 medısınalyq qyzmetker: 1014 dáriger, 1521 medbıke jumys isteýde.
Odan bólek keıbir saılaý ýchaskeleriniń janynda Jedel járdem kezekshilik etýde. Saılaýshylar maskamen kelýge mindetteledi, bolmaǵan jaǵdaıda betperde kireberiste beriledi. Eger daýys berýshiniń dene qyzýy kóterilip tursa, daýys berýge tyıym salynady. Daýys berýshi óz ýchaskesin 221-10-01 Call-ortalyǵy arqyly tegin bile alady nemese @sailau_almaty Telegram-bot kómegimen, sondaı-aq «Open Almaty» servıs ortalyǵynda jáne service.almaty.kz saıtynda bile alady.
