تانىمال ءانشى پاندەمياعا بايلانىستى ۇيلەرىندە داۋىس بەردى. سايلاۋ ۋچاسكەسىنىڭ قىزمەتكەرلەرى ءانشىنىڭ ۇيىنە كەلىپ، بيۋللەتەندەرىن جاشىككە سالىپ الىپ كەتتى.
– مەن پارلامەنت ءماجىلىسى دەپۋتاتتارىنىڭ سايلاۋىنا ۇنەمى قاتىسىپ كەلدىم. بيىل ءبىز ۇيدە داۋىس بەرەمىز. پاندەمياعا بايلانىستى بۇگىن سايلاۋ ۋچاسكەسىنىڭ قىزمەتكەرلەرى ۇيگە كەلەمىز دەدى. مەن كەلىسىم بەردىم. اركىمنىڭ كوزقاراسى ءارتۇرلى. بۇل ساياسي پىكىرگە دە بايلانىستى. ءار ادام سايلاۋدا ءوزىنىڭ ويىن، پىكىرىن جەتكىزەدى. بولاشاققا دەگەن سەنىمىن جەتكىزەدى، – دەدى ءانشى كومپوزيتور ەسكەندىر حاسانعالييەۆ.
ونىڭ ايتۋىنشا، ۇلى، رەسپۋبليكاعا ەڭبەگى سىڭگەن قايراتكەر، پ.چايكوۆكسيي اتىنداعى الماتى مۋزىكالىق كوللەدجىنىڭ ديرەكتورى ءبىرجان حاسانعالييەۆ ءقازىر سايلاۋ ۋچاسكەلەرىنىڭ بىرىنە جەتەكشى ەتىپ بەكىتىلگەن. «ول دا بالام ءۇشىن ۇلكەن جاۋاپكەرشىلىك ەكەنى راس. تاڭ اتپاي تۇرىپ، سول اۋقىمدى مىندەتتى اتقارۋعا كەتتى» دەدى ە.حاسانعالييەۆ.
ايتا كەتۋ كەرەك، 10 قاڭتاردا ق ر پارلامەنتى ءماجىلىسى مەن ءماسليحات دەپۋتاتتارىن سايلاۋ باستالدى. الماتىدا 507 سايلاۋ ۋچاسكەسى تاڭعى 07:00-دەن باستاپ اشىلدى. داۋىس بەرۋ ورىندارى «ق ر سايلاۋ تۋرالى» زاڭىنىڭ، ورتالىق سايلاۋ كوميسسياسىنىڭ تالاپتارىنا ساي كەلەدى. 507 ۋچاسكەدە 2535 مەديسينالىق قىزمەتكەر: 1014 دارىگەر، 1521 مەدبيكە جۇمىس ىستەۋدە.
ودان بولەك كەيبىر سايلاۋ ۋچاسكەلەرىنىڭ جانىندا جەدەل جاردەم كەزەكشىلىك ەتۋدە. سايلاۋشىلار ماسكامەن كەلۋگە مىندەتتەلەدى، بولماعان جاعدايدا بەتپەردە كىرەبەرىستە بەرىلەدى. ەگەر داۋىس بەرۋشىنىڭ دەنە قىزۋى كوتەرىلىپ تۇرسا، داۋىس بەرۋگە تىيىم سالىنادى. داۋىس بەرۋشى ءوز ۋچاسكەسىن 221-10-01 Call-ورتالىعى ارقىلى تەگىن بىلە الادى نەمەسە @sailau_almaty Telegram-بوت كومەگىمەن، سونداي-اق «Open Almaty» سەرۆيس ورتالىعىندا جانە service.almaty.kz سايتىندا بىلە الادى.
