Qazaqstan premer-ministri Oljas Bektenov búgingi Úkimet otyrysynda Saýda jáne integratsiia ministrligine basqa jumystyń bárin qoiyp, taýarlardy tańbalaý júiesiniń mańyzy men artyqshylyqtary týraly biznesti jan-jaqty aqparattandyrý jumysyn kúsheitýdi tapsyrdy, dep habarlaidy Dalanews.kz.
Úkimet basshysynyń aitýynsha, qazir qoldanystaǵy taýarlardy tsifrlyq baqylaý júiesi ónimniń sanaýly túrlerin ǵana qamtidy ári derekter bazasy men formattary birkelki emes. Osyǵan bailanysty Premer-ministr Qarjy jáne Saýda ministrlikterine basqa da memlekettik organdarmen birlesip, barlyq salada Ulttyq taýar katalogyn engizý jumystaryn jedeldetýdi tapsyrdy.
"Taǵy bir mańyzdy másele tehnikalyq retteý bolyp tabylady. Kásipkerler sertifikattaý protsedýralarynyń ashyq emestigin jáne qaitalana beretin qaǵaz qujattardy toltyrýǵa májbúr ekenin aitady. Bul máseleler sertifikattaý, akkreditteý jáne standarttaý mehanizmderin jańǵyrtýǵa baǵyttalǵan E-KTRM tehnikalyq retteý júiesi arqyly sheshilýi tiis. Saýda, Qarjy jáne Tsifrlyq damý ministrlikteri osy jyldyń sońyna deiin E-KTRM júiesiniń barlyq salalyq memlekettik organdardyń aqparattyq júielerimen tolyq integratsiialanýyn qamtamasyz etsin, – dedi Oljas Bektenov qatýly únmen.
Úkimet basshysynyń aitýynsha, kásipkerlerdiń kópshiliginde kóptegen taýarlar tobyn tańbalaý aiasyn keńeitý máselesine qatysty suraqtary bar.
"Taýarlardy tsifrlyq tańbalaý jobasy ishki naryqty kontrafaktilik ári sapasyz ónimderden qorǵap, otandyq óndirýshilerdiń básekege qabilettiligin arttyrýdy kózdeidi. Alaida Saýda ministrligi tarapynan kásipkerlerdi tańbalaýdyń mańyzy men onyń artyqshylyqtary týraly aqparattandyrý jumystary jetkiliksiz júrgizilgen. Sondyqtan túsindirý jumystaryn jandandyryp, tańbalanýǵa jatatyn taýarlar tizimin odan ári keńeitýdi jalǵastyrý qajet", – dedi Oljas Bektenov.
Sondai-aq premer-ministr Aýyl sharýashylyǵy ministrligine jyl sońyna deiin aýyl sharýashylyǵy ónimderin óndirýshilerdiń agromarketpleister arqyly jumys isteýin yntalandyratyn tetikter ázirleýdi tapsyrdy.
Buǵan deiin Úkimet bizneske arnalǵan jańa qazaq-qytai marketpleisin iske qosýdy qarastyryp jatqany habarlanǵan.
