قازاقستان پرەمەر-مينيسترى ولجاس بەكتەنوۆ بۇگىنگى ۇكىمەت وتىرىسىندا ساۋدا جانە ينتەگراسيا مينيسترلىگىنە باسقا جۇمىستىڭ ءبارىن قويىپ، تاۋارلاردى تاڭبالاۋ جۇيەسىنىڭ ماڭىزى مەن ارتىقشىلىقتارى تۋرالى بيزنەستى جان-جاقتى اقپاراتتاندىرۋ جۇمىسىن كۇشەيتۋدى تاپسىردى، دەپ حابارلايدى Dalanews.kz.
ۇكىمەت باسشىسىنىڭ ايتۋىنشا، ءقازىر قولدانىستاعى تاۋارلاردى سيفرلىق باقىلاۋ جۇيەسى ءونىمنىڭ ساناۋلى تۇرلەرىن عانا قامتيدى ءارى دەرەكتەر بازاسى مەن فورماتتارى بىركەلكى ەمەس. وسىعان بايلانىستى پرەمەر-مينيستر قارجى جانە ساۋدا مينيسترلىكتەرىنە باسقا دا مەملەكەتتىك ورگاندارمەن بىرلەسىپ، بارلىق سالادا ۇلتتىق تاۋار كاتالوگىن ەنگىزۋ جۇمىستارىن جەدەلدەتۋدى تاپسىردى.
"تاعى ءبىر ماڭىزدى ماسەلە تەحنيكالىق رەتتەۋ بولىپ تابىلادى. كاسىپكەرلەر سەرتيفيكاتتاۋ پروسەدۋرالارىنىڭ اشىق ەمەستىگىن جانە قايتالانا بەرەتىن قاعاز قۇجاتتاردى تولتىرۋعا ءماجبۇر ەكەنىن ايتادى. بۇل ماسەلەلەر سەرتيفيكاتتاۋ، اككرەديتتەۋ جانە ستاندارتتاۋ مەحانيزمدەرىن جاڭعىرتۋعا باعىتتالعان ە-كترم تەحنيكالىق رەتتەۋ جۇيەسى ارقىلى شەشىلۋى ءتيىس. ساۋدا، قارجى جانە سيفرلىق دامۋ مينيسترلىكتەرى وسى جىلدىڭ سوڭىنا دەيىن ە-كترم جۇيەسىنىڭ بارلىق سالالىق مەملەكەتتىك ورگانداردىڭ اقپاراتتىق جۇيەلەرىمەن تولىق ينتەگراسيالانۋىن قامتاماسىز ەتسىن، – دەدى ولجاس بەكتەنوۆ قاتۋلى ۇنمەن.
ۇكىمەت باسشىسىنىڭ ايتۋىنشا، كاسىپكەرلەردىڭ كوپشىلىگىندە كوپتەگەن تاۋارلار توبىن تاڭبالاۋ اياسىن كەڭەيتۋ ماسەلەسىنە قاتىستى سۇراقتارى بار.
"تاۋارلاردى سيفرلىق تاڭبالاۋ جوباسى ىشكى نارىقتى كونترافاكتىلىك ءارى ساپاسىز ونىمدەردەن قورعاپ، وتاندىق وندىرۋشىلەردىڭ باسەكەگە قابىلەتتىلىگىن ارتتىرۋدى كوزدەيدى. الايدا ساۋدا مينيسترلىگى تاراپىنان كاسىپكەرلەردى تاڭبالاۋدىڭ ماڭىزى مەن ونىڭ ارتىقشىلىقتارى تۋرالى اقپاراتتاندىرۋ جۇمىستارى جەتكىلىكسىز جۇرگىزىلگەن. سوندىقتان ءتۇسىندىرۋ جۇمىستارىن جانداندىرىپ، تاڭبالانۋعا جاتاتىن تاۋارلار ءتىزىمىن ودان ءارى كەڭەيتۋدى جالعاستىرۋ قاجەت"، – دەدى ولجاس بەكتەنوۆ.
سونداي-اق پرەمەر-مينيستر اۋىل شارۋاشىلىعى مينيسترلىگىنە جىل سوڭىنا دەيىن اۋىل شارۋاشىلىعى ونىمدەرىن وندىرۋشىلەردىڭ اگروماركەتپلەيستەر ارقىلى جۇمىس ىستەۋىن ىنتالاندىراتىن تەتىكتەر ازىرلەۋدى تاپسىردى.
بۇعان دەيىن ۇكىمەت بيزنەسكە ارنالعان جاڭا قازاق-قىتاي ماركەتپلەيسىن ىسكە قوسۋدى قاراستىرىپ جاتقانى حابارلانعان.
