2025 jyldyń tamyzynda aqsha aiyrbas oryndarynan el azamattary dollardy kóptep satyp alyp, kerisinshe rýbldi belsendi túrde aiyrbastaýǵa tyrysqan, dep habarlaidy Dalanews.kz.
Ulttyq Bank usynǵan statistikalyq málimetke sáikes, bir ai barysynda dollar satyp alýdyń taza kólemi 15%-ǵa ósip, 138,8 mlrd teńgege jetti. Rýblmen bailanysty netto-operatsiialar minýs 31 mlrd teńge boldy. Shildede bul kórsetkish odan da joǵary bolǵan: - 53,2 mlrd teńge. Bul reseilik valiýtanyń álsizdigine degen senimsizdik pen ony jinaq quraly retinde paidalanýdyń tómendigin kórsetedi.
Sarapshylardyń pikirinshe, jazǵy maýsymda shetelge saiahat pen importtyq tólemderdiń kóbeiýi valiýtaǵa degen suranysty kúsheitken.
Buǵan deiin 2025 jyly aqsha aiyrbas oryndarynda rýbldiń taza satylymyndaǵy teris mán alǵashqy bes ai boiy qatarynan tirkelgenin jazǵanbyz. Sondai-aq tamyzdyń basynda qymbatshylyqqa urynǵan reseilikter Qazaqstanǵa lap qoiǵanyn, ainalymda rýbl kólemi kúrt artqany da aitylǵan edi. Ekonomister sol kezde elimizge saýda jasaýshylarmen birge qosymsha rýbl massasy laqyldap keletinin eskertken. Al ol, óz kezeginde, aldaǵy ýaqytta teńge baǵamyna áser etýi yqtimal.
"Bul arada mynandai eki úlken másele baryn durys túsingen jón. Birinshiden, rýbl - ishinara aiyrbastaýǵa jatatyn valiýta. Al, bizge kóp rýbl keldi delik, sodan keiin biz olardy qaida jiberemiz? Iaǵni, olardy aiyrbastaý qiyn. Kóptegen shekteýler bar. Bul - bir. Ekinshiden, bul óte mańyzdysy, bizde investitsiia máselesi degen bar. Iaǵni, bári teń bolǵan jaǵdaida suranys artqanda siz óndiristi keńeitýińiz kerek nemese osy taýarlardy jetkizý júiesin keńeitip, kóp paida tabýyńyzǵa bolady. Biraq bizde bul jaǵynan problemalar bar. Demek, mundai jaǵdaida naryqtyq ádister túzetýge jaramsyz", - deidi ekonomist Marat Kaiyrlenov.
Qazaqstandyqtardyń ózderi de rýblge senimdi aktiv retinde qaramaidy. Qarjy uiymdarynyń málimetinshe, maýsym aiynda elimizde Resei valiýtasynyń taza satylymy 40 milliard teńgeden asty, bul - barlyq kezeńdegi eń kóp kólem. Al ekonomist Eldar Shamsýtdinov Qazaqstan Resei úshin dollar satyp alatyn tranzittik habqa ainalǵan-mys degen tosyn tujyrymymen bólisken. Sarapshynyń aitýynsha, KASE valiýtalyq sektsiiasyndaǵy rýbl ainalymy kúrt artyp, rýbldi dollarmen aiyrbastaý operatsiialary jiilegen. Reseiden aǵylǵan rýbl Qazaqstannyń ishki naryǵyndaǵy dollarǵa suranysty jasandy túrde arttyryp, turaqty valiýtalyq ajiotaj qalyptastyryp otyr.
