2025 جىلدىڭ تامىزىندا اقشا ايىرباس ورىندارىنان ەل ازاماتتارى دوللاردى كوپتەپ ساتىپ الىپ، كەرىسىنشە ءرۋبلدى بەلسەندى تۇردە ايىرباستاۋعا تىرىسقان، دەپ حابارلايدى Dalanews.kz.
ۇلتتىق بانك ۇسىنعان ستاتيستيكالىق مالىمەتكە سايكەس، ءبىر اي بارىسىندا دوللار ساتىپ الۋدىڭ تازا كولەمى 15%-عا ءوسىپ، 138،8 ملرد تەڭگەگە جەتتى. رۋبلمەن بايلانىستى نەتتو-وپەراسيالار مينۋس 31 ملرد تەڭگە بولدى. شىلدەدە بۇل كورسەتكىش ودان دا جوعارى بولعان: - 53،2 ملرد تەڭگە. بۇل رەسەيلىك ۆاليۋتانىڭ السىزدىگىنە دەگەن سەنىمسىزدىك پەن ونى جيناق قۇرالى رەتىندە پايدالانۋدىڭ تومەندىگىن كورسەتەدى.
ساراپشىلاردىڭ پىكىرىنشە، جازعى ماۋسىمدا شەتەلگە ساياحات پەن يمپورتتىق تولەمدەردىڭ كوبەيۋى ۆاليۋتاعا دەگەن سۇرانىستى كۇشەيتكەن.
بۇعان دەيىن 2025 جىلى اقشا ايىرباس ورىندارىندا ءرۋبلدىڭ تازا ساتىلىمىنداعى تەرىس ءمان العاشقى بەس اي بويى قاتارىنان تىركەلگەنىن جازعانبىز. سونداي-اق تامىزدىڭ باسىندا قىمباتشىلىققا ۇرىنعان رەسەيلىكتەر قازاقستانعا لاپ قويعانىن، اينالىمدا رۋبل كولەمى كۇرت ارتقانى دا ايتىلعان ەدى. ەكونوميستەر سول كەزدە ەلىمىزگە ساۋدا جاساۋشىلارمەن بىرگە قوسىمشا رۋبل ماسساسى لاقىلداپ كەلەتىنىن ەسكەرتكەن. ال ول، ءوز كەزەگىندە، الداعى ۋاقىتتا تەڭگە باعامىنا اسەر ەتۋى ىقتيمال.
"بۇل ارادا مىنانداي ەكى ۇلكەن ماسەلە بارىن دۇرىس تۇسىنگەن ءجون. بىرىنشىدەن، رۋبل - ءىشىنارا ايىرباستاۋعا جاتاتىن ۆاليۋتا. ال، بىزگە كوپ رۋبل كەلدى دەلىك، سودان كەيىن ءبىز ولاردى قايدا جىبەرەمىز؟ ياعني، ولاردى ايىرباستاۋ قيىن. كوپتەگەن شەكتەۋلەر بار. بۇل - ءبىر. ەكىنشىدەن، بۇل وتە ماڭىزدىسى، بىزدە ينۆەستيسيا ماسەلەسى دەگەن بار. ياعني، ءبارى تەڭ بولعان جاعدايدا سۇرانىس ارتقاندا ءسىز ءوندىرىستى كەڭەيتۋىڭىز كەرەك نەمەسە وسى تاۋارلاردى جەتكىزۋ جۇيەسىن كەڭەيتىپ، كوپ پايدا تابۋىڭىزعا بولادى. ءبىراق بىزدە بۇل جاعىنان پروبلەمالار بار. دەمەك، مۇنداي جاعدايدا نارىقتىق ادىستەر تۇزەتۋگە جارامسىز"، - دەيدى ەكونوميست مارات كايىرلەنوۆ.
قازاقستاندىقتاردىڭ وزدەرى دە رۋبلگە سەنىمدى اكتيۆ رەتىندە قارامايدى. قارجى ۇيىمدارىنىڭ مالىمەتىنشە، ماۋسىم ايىندا ەلىمىزدە رەسەي ۆاليۋتاسىنىڭ تازا ساتىلىمى 40 ميلليارد تەڭگەدەن استى، بۇل - بارلىق كەزەڭدەگى ەڭ كوپ كولەم. ال ەكونوميست ەلدار شامسۋتدينوۆ قازاقستان رەسەي ءۇشىن دوللار ساتىپ الاتىن ترانزيتتىك حابقا اينالعان-مىس دەگەن توسىن تۇجىرىمىمەن بولىسكەن. ساراپشىنىڭ ايتۋىنشا، KASE ۆاليۋتالىق سەكسياسىنداعى رۋبل اينالىمى كۇرت ارتىپ، ءرۋبلدى دوللارمەن ايىرباستاۋ وپەراسيالارى جيىلەگەن. رەسەيدەن اعىلعان رۋبل قازاقستاننىڭ ىشكى نارىعىنداعى دوللارعا سۇرانىستى جاساندى تۇردە ارتتىرىپ، تۇراقتى ۆاليۋتالىق اجيوتاج قالىپتاستىرىپ وتىر.
