Bas prokýrordyń orynbasary Áset Shyndaliev Astanadaǵy LRT qurylysy kezinde qarjy jymqyrdy degen aiyppen sottalǵandardy quqyq qorǵaý organdary nege Qazaqstanǵa qaitara almaitynyn túsindirýge tyrysty, dep habarlaidy Dalanews.kz Ulysmedia.kz-ke siltep.
Sheneýniktiń málimetinshe, Interpol «Astana LRT» jaýapkershiligi shekteýli seriktestiginiń burynǵy basqarma tóraǵasy Talǵat Ardan men astana ákiminiń burynǵy orynbasary Qanat Sultanbekovti izdestirip jatyr.
- Izdeýdiń birneshe túri bar. Bizdiń quqyq qorǵaý organdarymyz kóbine memlekettik ishindegi izdeý jumystarymen ainalysady. Al halyqaralyq izdeýmen interpol ainalysady. Biz sáikesinshe interpolǵa tapsyrma beremiz, olar sonymen ainalysady, deidi Shyndaliev.
Onyń sózinshe, interpol ázirge syrttai sottalǵandar qai elderde ekenin anyqtai alǵan joq, sondyqtan olardy Qazaqstanǵa ekstraditsiialaý múmkin bolmai otyr. Jýrnalister Talǵat Ardan men Qanat Sultanbekovtyń áleýmettik jelide beinerolikter jariialap jatqanyn atap ótti.
- Ekstraditsiialaý úshin interpol ol adamdardyń naqty qaida júrgenin anyqtaýy kerek. Sodan keiin ekstraditsiialyq qamaýǵa alýymyz múmkin. Ázirge interpol tarapynan olardyń qaida júrgeni týraly naqty aqparat joq, deidi bas prokýrordyń orynbasary.
