Zańger Daniiar Baiǵabatov Sherzat Bolattyń isine qatysty sot protsesiniń ashyq jáne onlain rejimde ótýine qatysty suraqqa jaýap berdi, –dep habarlaidy Dalanews.kz tilshisi Tengrinews.kz-ke silteme jasap.
Zańgerdiń sózinshe, protsestiń ashyq ótýi birneshe faktorǵa bailanysty. Eń aldymen protsesti onlain ótkizý úshin tehnikalyq múmkindikter bar-joǵy qarastyrylady. Mundai isterde qoǵamdyq rezonans ta áser etýi múmkin.
Daniiar Baiǵabatov eger jábirlenýshi tarap – Sherzattyń ata-anasy protsesti onlain, ashyq ótkizýge ótinish berse jáne transliatsiia júrgizýge tehnikalyq múmkindik bolsa, Joǵarǵy sot tarapynan ruqsat berilýi múmkin ekenin aitady.
"Zań boiynsha BAQ ókilderi qatysa alatyn jáne qarapaiym azamattar onlain kóre alatyn ashyq sot protsesterin ótkizýge bolady. Alaida eger aiyptalýshylar túrleriniń transliatsiiada taralyp ketýine qarsy shyqsa, ol protsestiń onlain ótýi nemese ótpeýi týraly sheshim qabyldaýda áser etýi múmkin. Mundai jaǵdaida aiyptalýshylardyń túri transliatsiiadan kórsetilmeýi múmkin", – deidi Baiǵabatov.
Odan bólek, zańgerdiń sózinshe, keibir jaǵdaida eger aiyptalýshylar nemese olardyń advokattary sotty jabyq ótkizýge ótinish berse, sot transliatsiiany ótkizbei qoiýy múmkin.
"Protsess kezinde sýdia transliatsiia júrgizýge qatysty naqty sheshim shyǵarady. Sebebi aiyptalýshylardyń da konstitýtsiialyq quqyǵy bar", – deidi zańger.
Qazirgi tańda is áli sotqa jetken joq. Sebebi tergeý amaldary áli júrgizilip jatyr. Zańgerdiń aitýynsha, tergeý amaldary uzaqqa sozylýy múmkin, sebebi bul iske qatysty kúdikti adam sany kóp jáne saraptama kóp júrgizip, kúdiktilerden jaýap alynýy kerek.
Aita keteiik, 4 qazanǵa qaraǵan túni Talǵarda jantúrshigerlik qylmys boldy. Qolynda pyshaq pen qarýy bar bir top jigit 16 jastaǵy Sherzat, ákesi men aǵasyna shabýyl jasaǵan.
Sherzattyń ákesi jalǵa dúken alyp, saýda jasaýmen ainalysatyn. Arty ólimmen aiaqtalǵan tóbeles osy dúkennen bastalǵan. Bir jigit dúkenge kelip, syra alyp, aqshasyn tólemei kete barǵan. Sherzattyń ákesi syranyń aqshasyn tóleýdi talap etken kezde janjal týyndaǵan.
Sherzat osy sátte klienttiń dúkennen shyǵyp ketýin suraǵan. Biraq syra alǵan jigit dostaryna qońyraý soǵyp, dúkenge úsh kólikpen bir top jigit kelgen. Bir top jigit Sherzatty tepkilei bastaǵan. Bul sátti turǵyndar videoǵa túsirip alǵan. 10-synypta oqityn Sherzat ata-anasynyń dúkenine kezdeisoq kelgen. Sýyq qarýmen kelgen buzaqylar eshkimdi aiamapty. Qansyraǵan bir otbasynyń músheleri aýrýhanaǵa jetkizilgen. Kóp uzamai Sherzat jansaqtaý bóliminde kóz jumǵan. Qaza tapqan jigittiń ata-anasy politseiler oqiǵaǵa qatysty adamnyń bárin ustamaǵanyn aityp, dabyl qaqqan.
Almaty oblysynyń politsiia departamenti kámeletke tolmaǵan balany óltirý faktisi boiynsha politsiia qylmystyq is qozǵaǵanyn habarlady. Oqiǵanyń barlyq qatysýshylary ustaldy jáne ýaqytsha ustaý izoliatoryna qamaldy.
Oblystyq prokýratýra ókilderi bul oqiǵa jiti baqylaýda ekenin habarlady.
