Talǵarda bir top buzaqynyń qolynan qaza tapqan 16 jastaǵy Sherzattyń dostary oqiǵa ornynda 13 adamnyń bolǵanyn rastady, dep jazady Dalanews.kz.
Marqumnyń dostarynyń aitýynsha, tóbeleske 11 er adam, eki áiel adam qatysqan.
“Basynda 3 adam boldy. Artynsha Hyundai Accent kóligimen taǵy úsh adam keldi. Sosyn qatarǵa Mercedes kabanmen taǵy 5 erkek, 2 áiel adam qosyldy. Biraq qazir estýim boiynsha, tek jeteýi qamaýǵa alynǵan. Eki áiel adam dúkennen anasyn shyǵarmai ustap turdy”, - deidi marqumnyń dosy.
Ekinshi kýáger de dosynyń sózin qostap otyr.
“Biz kelgen ýaqytta olar dos balamdy uryp-taldyryp, basyn jarǵan edi. Sodan soń bizdi de pyshaqpen qýalai jóneldi. Al eki áiel adam ákesi men anasyn ustap otyrdy”, - deidi ekinshi kýáger.
Eske salaiyq, buǵan deiin Talǵarda jappai tóbeles bolyp, saldarynan 16 jastaǵy jasóspirim kóz jumdy. Janjal jigittiń otbasy jalǵa alatyn dúkennen bastalǵan. Týystarynyń aitýynsha, saýda núktesine kelgen satyp alýshy syra alyp, aqshasyn tóleýden bas tartqan. Osy jaǵdaidan keiin tóbeles bastalǵan.
Kámeletke tolmaǵan balany óltirý faktisi boiynsha Almaty oblysynyń politsiia departamenti qylmystyq is qozǵady.
Qazirgi tańda kináli dep tanylǵan 7 adam ustalyp, ýaqytsha ustaý izoliatoryna qamaýǵa alynǵan.
"Sherzattyń isi atyshýly Qýandyq Bishimbaevtyń sotynan kem emes, óitkeni munda búkil qoǵamnyń ádildikke degen suranysy tur",- dep paiymdaidy osy tusta DALA INSIDE.
15 myń oqyrmany bar tanymal telegram-arnanyń paiymdaýynsha, Sherzattyń isinde qazaqtildi orta tek zańdyq normalardy saqtaýdy ǵana emes, quqyqtyq júieniń árbir elementiniń ádil bolýyn talap etýde.
"Iá, Bishimbaevtyń isi de dál osylai qoǵam nazarynda boldy. Sherzattyń isinde saiasi nemese joǵary deńgeidegi tulǵalar bolmasa da, qylmystyń qatygezdigi men qoǵamdyq áseri ony odan da mańyzdy etedi.
Mundai isterde halyqtyń talabyna jaýap berý zań turǵysynan ǵana emes, moraldyq turǵyda da mańyzdy.
Qoǵamnyń talap etip otyrǵany – ádil sot, shynaiy jazalaý jáne sot protsesiniń ashyqtyǵy. Mundai talaptardy elemeý – halyqtyń bilikke degen senimin álsiretetin qadam bolmaq.
Bishimbaevtyń isi – joǵary deńgeidegi sheneýniktiń áielin qinap óltirýi jáne bul istiń tikelei efirde kórsetilýi mańyzdy pretsedent ornatty. Bul sot qoǵamǵa ádildik júiesiniń ashyqtyq qaǵidasyn kórsetti.
Biraq tek ashyqtyq jetkiliksiz. Sherzattyń jaǵdaiynda qoǵam tek zańdyq turǵydan ádildikke jetip qana qoimai, moraldyq qanaǵattanýdy da talap etedi. Qoǵamda qylmysqa qatysty jaýapkershiliktiń tolyqtyǵy men ádildigi suralyp otyrǵanda, biliktiń bul máseleni eskermeýi úlken áleýmettik tolqyn týdyrýy múmkin.
Bishimbaevtyń kinásin moiyndamaýy jáne sot protsesindegi kúdikti sátter onyń jazadan qutylyp ketý qaýpin týdyrdy. Sherzattyń isinde onyń aýqymyn odan da keńirek qarastyrý qajet.
Halyq tek 7 kúdiktiniń ustalǵanyna kúmánmen qaraidy, óitkeni is barysynda qylmysqa 13 adam qatysqany týraly málimetter bar. Oqiǵaǵa birneshe adam qatysyp, olardyń birqatary jazasyz qalýy múmkin degen qaýesetter jurttyń narazylyǵy men kúdigin kúsheitýde.
Jasóspirimder arasynda zorlyq-zombylyqtyń beleń alýy, ásirese qylmystyq toptyń qatysýymen oryn alǵan bul oqiǵa jabyq esik jaǵdaiynda qaralsa, kinálilerdiń jazasyz qalý múmkindigin týǵyzady.
Eger bul is jabyq túrde ótse, bul tek qana quqyqtyq ádiletsizdikke jol ashpaidy, sonymen qatar qoǵamdaǵy zorlyq-zombylyqtyń jazasyz qalýyna yqpal etedi.
Bilik bul kontekste quqyqtyq júieniń turaqtylyǵy tek zańdarǵa ǵana emes, qoǵamnyń senimine de táýeldi ekenin túsinýi kerek",- deidi osy oraida DALA INSIDE.
