Fılologıa ǵylymdarynyń doktory, profesor, Tańjaryqtanýshy ǵalym, qordyń ǵylymı keńesshisi Temirhan Tebegenov, qoǵam qaıratkeri, qor keńesshisi Rahym Aıypuly, belgili aıtysker aqyndar Serik Qalıev, Ábdiǵanı Bázilhanuly, Jumataı Ospanuly qazylyq etken baıqaýda qatysýshylar Tańjaryq óleńderin mánerlep jatqa oqýdan jáne aqyn ómiri men shyǵarmashylyǵyna qatysty suraqtarǵa jaýap berýden jarysqa tústi. Jeńimpazdar aqshalaı syılyqqa qol jetkizdi. Bas júlde men oǵan belgilengen 50 000 teńgen i(qor keńesshisi, ádebıet synshysy Omaráli Ádilbekuly taǵaıyndaǵan) QyzPÝ-dyń stýdenti Aqgúl Aıdarbekova alsa, 1-oryndy Taldyqorǵan polıtehnıkalyq kolejiniń İ kýrs stýdenti Juldyz Bekmuratqyzy(40 000) ıelendi. Al júldeli 2-oryndardy Abaı atyndaǵy QazUPÝ stýdenti Saltanat Ánapıaeva men QyzPÝ-dyń stýdenti Aıjan Meldebek enshiledi. Sondaı-aq, árqaısysy 15 000 teńgeni quraıtyn 3 júlde Jetisý ýnıversıtetinen qatysqan 3 stýdentke buıyrdy.
Jastardyń Tańjaryqtanýǵa degen yqylasy men peıili joǵary, alǵan áseri men túıgen bilimi mol boldy. Oǵan dálel, mamandyǵy basqa Taldyqorǵan polıtehnıkalyq kolejinen 10-ǵa tarta stýdenttiń aqyn óleńin jattap, ómirine úńilip, asa zor ynta tanytýy.
Tústen keıin ótken ádebı-sazdy keshte belgili ánshi Nurjan Janpeıisov, Sáýlejan Taqzıa, "Amanat" toby, t.b. ánshiler jáne Almaty men jetisýlyq jas aqyndar qatysyp Tańjaryqtyń ánderin oryndap, aqyn rýhyn asqaqtatyp aıtys jasady.
Osylaısha, jyl ótken saıyn Tańjaryq aqynǵa degen jastardyń tanymy, qurmeti men zerttep-zerdeleýge degen qulshynysy artyp, deńgeıi de joǵarlap keledi. Buǵan deıin qatarynan 3 jyl boıy Almatyda qalalyq deńgeıde ótken "Tańjaryq oqýlary" bıyl alǵash ret aımaqaralyq ádebı básekege kóterildi.
Jarqyn SÁLENULY, jýrnalıs
