Erteń, iaǵni shildeniń 5-shi juldyzynda jeńimpazdy marapattaý rásimi ótpek. Daýys berýshiler basty marapatqa Sharhan Qazyǵuldyń «Kúlpet» romanyn laiyq dep tapty.
Roman nege «Kúlpet» dep atalady?
«Ana tili» gazetiniń jazýynsha «Kúlpet» degen sóz «jan azaby» degen maǵynany, al osyǵan uqsas «Kúlmet» degen sóz adamnyń ómirde bilip, bilmei jibergen qateligi, aiyby, qylmystyq isi degendi bildiredi. Negizgi keiipker – Ábýjan Aral óńirindegi Erden jylqyshynyń jalǵyz uly. Ákesi onyń jylqyshy bolǵanyn qalamaidy. Qazirgi zaman oqyǵannyń zamany dep, balasyn oqytýǵa kúsh salady. Ábýjan Aqtóbe meditsinalyq institýtyn bitirip, jumysqa kirisken tusta eriksiz Aýǵanǵa ásker qataryna alynatyndardyń tizimine kirgizilip, soǵysqa attanady. Soǵystan keiin de elge qaita almai amalsyz Amerikadan biraq shyǵady. Aýǵanǵa barýy da, Amerikaǵa ótýi de Allanyń emes, adamnyń qyrsyq-qiianatynyń saldary edi. Ábýjan eline 37 jyldan soń biraq oralady.
Mecenat.kz jobasynyń habarlaýynsha, saitta 1916 roman boiynsha 1062 oqyrman tirkelgen, olardyń ishinde nátijeli, eshqandai kúdik týdyrmaityn 222 daýys jinalǵan. «Kúlpet» romany boiynsha saitta 1024 oqyrman tirkelgen, olardyń ishinde nátijeli, eshqandai kúdik týdyrmaityn 566 daýys jinaldy. Sońynda tek nátijeli daýystar ǵana esepke alyndy. Iaǵni ózin jáne daýys berý deregin rastaǵan oqyrmannyń ǵana daýysy sanaldy.
Mecenat.kz jobasy jyl saiyn úzdik roman avtoryn irikteidi de, oǵan ómiriniń sońyna deiin ai saiyn 500 dollar tólep turýǵa mindetteledi. Oǵan belgili metsenattar, bankirler men qarjygerler kómektesip otyrady.
