Jetisý oblysynda osymen onynshy «Januia» otbasyn qoldaý ortalyǵy ashyldy. Endi mundai ortalyqtar óńirdiń barlyq aýdandary men qalalarynda jumys isteidi, dep habarlaidy Dalanews.kz.
Biyl osyndai qoldaý ortalyqtary Eskeldi, Kóksý jáne Aqsý aýdandarynda ashylsa, endi «Januia» ortalyǵy oblys ortalyǵy Taldyqorǵanda da óz jumysyn bastady.
– Memleket basshysynyń tapsyrmasyn oryndaý aiasynda óńirde otbasylarǵa jáne áleýmettik osal sanattaǵy azamattarǵa qoldaý kórsetý baǵytynda belsendi jumys júrgizilýde. Qiyn ómirlik jaǵdaiǵa tap bolǵan otbasylardy anyqtap, qoldaý maqsatynda qurylǵan «Januia» ortalyqtary 2023 jyldan bastap Jetisý oblysynyń aýdan-qalalarynda ashyla bastady. Búginde bul ortalyqtar áleýmettik qorǵaý júiesiniń mańyzdy bóligine ainalyp, óńir turǵyndaryna tegin psihologiialyq, quqyqtyq, áleýmettik jáne gýmanitarlyq kómek kórsetip keledi, – dedi Jetisý oblysynyń jumyspen qamtýdy úilestirý jáne áleýmettik baǵdarlamalar basqarmasynyń basshysy Ermek Mizambaev.
Basqa da «Januia» otbasyn qoldaý ortalyqtaryndaǵydai, Taldyqorǵan qalasynda ashylǵan jańa ortalyqta quqyqtyq, psihologiialyq jáne áleýmettik kómek qyzmetiniń 12 túri tegin kórsetiledi. Turmystyq zorlyq-zombylyqtan zardap shekkender ortalyqta bir aiǵa deiin ýaqytsha tura alady. Osy ýaqyt aralyǵynda qujattardy rásimdeýge, jumysqa ornalasýǵa, biliktiligin arttyrýǵa kómek kórsetiledi.
Jertólesi bar eki qabatty ǵimaratta balalar bólmesi, 10 oryndyq jatyn bólme, májilis zaly, fitnes zaly, psiholog pen zańger kabinetteri, tirkeý orny jáne basqa da qajetti bólmeler bar. Munda 15 jumys orny quryldy. Aita keterligi, jańa ortalyq sybailas jemqorlyqqa qarsy saiasat aiasynda memleket menshigine qaitarylǵan ǵimaratta ornalasqan.
Qyzmet alýshylar da jańa ortalyqtyń jumysyna qatysty óz pikirin bildirdi:
– Kúieýimmen ajyrasqannan keiin qiyn jaǵdaiǵa tap boldym. Osy ortalyq týraly buqaralyq aqparat quraldarynan bilgen soń, tegin zań kómegin alý úshin osynda júgindim. Jalpy ózime qajet bolǵan barlyq aqparatty aldym. Munda túrli kýrstardan ótip, jańa nárselerdi úirenýge jaǵdai jasalǵan. Sondyqtan mundai ortalyqtardyń mańyzy zor dep sanaimyn, – dedi kóp balaly ana Baljan Álimhanqyzy.
Ortalyqqa júgingen taǵy bir kóp balaly ana Gúlnur Qajybaeva bylai deidi:
– Kórshilerimnen Taldyqorǵanda osyndai otbasyn qoldaý ortalyǵy ashylyp jatqanyn estidim. Búgin arnaiy kelip, zańgerden keńes aldym. Munda jaqsy qabyldady, janashyr mamandar jumys isteitinin kórdim. Kómekke muqtaj jandar bul jerden tek jyly sóz ǵana emes, naqty qoldaý tabatynyna senemin.
