جەتىسۋ وبلىسىندا وسىمەن ونىنشى «جانۇيا» وتباسىن قولداۋ ورتالىعى اشىلدى. ەندى مۇنداي ورتالىقتار ءوڭىردىڭ بارلىق اۋداندارى مەن قالالارىندا جۇمىس ىستەيدى، دەپ حابارلايدى Dalanews.kz.
بيىل وسىنداي قولداۋ ورتالىقتارى ەسكەلدى، كوكسۋ جانە اقسۋ اۋداندارىندا اشىلسا، ەندى «جانۇيا» ورتالىعى وبلىس ورتالىعى تالدىقورعاندا دا ءوز جۇمىسىن باستادى.
– مەملەكەت باسشىسىنىڭ تاپسىرماسىن ورىنداۋ اياسىندا وڭىردە وتباسىلارعا جانە الەۋمەتتىك وسال ساناتتاعى ازاماتتارعا قولداۋ كورسەتۋ باعىتىندا بەلسەندى جۇمىس جۇرگىزىلۋدە. قيىن ومىرلىك جاعدايعا تاپ بولعان وتباسىلاردى انىقتاپ، قولداۋ ماقساتىندا قۇرىلعان «جانۇيا» ورتالىقتارى 2023 جىلدان باستاپ جەتىسۋ وبلىسىنىڭ اۋدان-قالالارىندا اشىلا باستادى. بۇگىندە بۇل ورتالىقتار الەۋمەتتىك قورعاۋ جۇيەسىنىڭ ماڭىزدى بولىگىنە اينالىپ، ءوڭىر تۇرعىندارىنا تەگىن پسيحولوگيالىق، قۇقىقتىق، الەۋمەتتىك جانە گۋمانيتارلىق كومەك كورسەتىپ كەلەدى، – دەدى جەتىسۋ وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ەرمەك ميزامبايەۆ.
باسقا دا «جانۇيا» وتباسىن قولداۋ ورتالىقتارىنداعىداي، تالدىقورعان قالاسىندا اشىلعان جاڭا ورتالىقتا قۇقىقتىق، پسيحولوگيالىق جانە الەۋمەتتىك كومەك قىزمەتىنىڭ 12 ءتۇرى تەگىن كورسەتىلەدى. تۇرمىستىق زورلىق-زومبىلىقتان زارداپ شەككەندەر ورتالىقتا ءبىر ايعا دەيىن ۋاقىتشا تۇرا الادى. وسى ۋاقىت ارالىعىندا قۇجاتتاردى راسىمدەۋگە، جۇمىسقا ورنالاسۋعا، بىلىكتىلىگىن ارتتىرۋعا كومەك كورسەتىلەدى.
جەرتولەسى بار ەكى قاباتتى عيماراتتا بالالار بولمەسى، 10 ورىندىق جاتىن بولمە، ءماجىلىس زالى، فيتنەس زالى، پسيحولوگ پەن زاڭگەر كابينەتتەرى، تىركەۋ ورنى جانە باسقا دا قاجەتتى بولمەلەر بار. مۇندا 15 جۇمىس ورنى قۇرىلدى. ايتا كەتەرلىگى، جاڭا ورتالىق سىبايلاس جەمقورلىققا قارسى ساياسات اياسىندا مەملەكەت مەنشىگىنە قايتارىلعان عيماراتتا ورنالاسقان.
قىزمەت الۋشىلار دا جاڭا ورتالىقتىڭ جۇمىسىنا قاتىستى ءوز پىكىرىن ءبىلدىردى:
– كۇيەۋىممەن اجىراسقاننان كەيىن قيىن جاعدايعا تاپ بولدىم. وسى ورتالىق تۋرالى بۇقارالىق اقپارات قۇرالدارىنان بىلگەن سوڭ، تەگىن زاڭ كومەگىن الۋ ءۇشىن وسىندا جۇگىندىم. جالپى وزىمە قاجەت بولعان بارلىق اقپاراتتى الدىم. مۇندا ءتۇرلى كۋرستاردان ءوتىپ، جاڭا نارسەلەردى ۇيرەنۋگە جاعداي جاسالعان. سوندىقتان مۇنداي ورتالىقتاردىڭ ماڭىزى زور دەپ سانايمىن، – دەدى كوپ بالالى انا بالجان ءالىمحان قىزى.
ورتالىققا جۇگىنگەن تاعى ءبىر كوپ بالالى انا گۇلنۇر قاجىبايەۆا بىلاي دەيدى:
– كورشىلەرىمنەن تالدىقورعاندا وسىنداي وتباسىن قولداۋ ورتالىعى اشىلىپ جاتقانىن ەستىدىم. بۇگىن ارنايى كەلىپ، زاڭگەردەن كەڭەس الدىم. مۇندا جاقسى قابىلدادى، جاناشىر ماماندار جۇمىس ىستەيتىنىن كوردىم. كومەككە مۇقتاج جاندار بۇل جەردەن تەك جىلى ءسوز عانا ەمەس، ناقتى قولداۋ تاباتىنىنا سەنەمىن.
