AQSh-ta joǵalyp ketken qazaqstandyq Áset Quralbaidyń oqiǵasy qaiǵyly aiaqtaldy. Politsiia men jaqyndary onyń qaza tapqanyn rastaǵan. Qazir marqumnyń sońǵy kúnderine, turǵan jerine jáne kóliginiń tabylýyna qatysty jańa derekter aitylyp jatyr, dep dalanews.kz tilshisi Ulysmedia.kz saityna silteme jasap habarlaidy.
Belgili bolǵandai, Áset Quralbai AQSh-qa shamamen tórt jyl buryn barǵan. Ol Illinois shtatynda turyp, Amazon kompaniiasynyń jetkizý qyzmetinde jumys istegen.
Keiin onyń Chikago mańyndaǵy Ford-Haits eldi mekeninde turǵany belgili boldy. Áleýmettik jelidegi derekterge qaraǵanda, ol 1324 Park Avenue mekenjaiyndaǵy úide turýy múmkin. Bul aýdan jergilikti qaýipsizdik reitingterinde qylmys deńgeii joǵary aimaqtardyń biri retinde sipattalady.
Jýrnalister barǵan kóshede eski úiler, qaraýsyz qalǵan aýlalar men tozǵan joldar baiqalǵan. Áleýmettik jeli qoldanýshylarynyń aitýynsha, bul mańda TMD elderinen barǵan migranttar arzan bólme jaldap turýy múmkin.
Áset Quralbai sońǵy ret 2026 jylǵy 2 maýsymda bailanysqa shyqqan. Sol kúni ol úlken aǵasymen telefon arqyly sóilesken. Osydan keiin onymen bailanys úzilgen.
Alǵashynda týystary qatty alańdamaǵan. Sebebi Áset buryn da birneshe kúnge telefonyn óshirip, jalǵyz qalatyn bolǵan. Alaida bes kún boiy habar bolmaǵan soń jaqyndary alańdai bastaǵan.
7 maýsymda onyń telefony tolyq óship qalǵan. Osydan keiin otbasy Chikagodaǵy tanystarynan Ásettiń turǵan jerin baryp tekserýdi suraǵan.
Tanystary onyń bólmesine kirgende, jaǵdaidyń kúmándi ekenin baiqaǵan. Sebebi Áset úiinde barlyq qujatyn, bank kartalaryn jáne jeke zattaryn qaldyryp ketken.
Eń alańdatarlyq derek – bólmeden qoshtasý hatynyń tabylýy. Onda 24 jastaǵy jigit ózine birdeńe bolsa, jeke zattary men qujattaryn kimge berý kerektigin jazyp ketkeni aitylady.
