Qaita ómirge kelgendei jasaryp, jańarǵan qalada zamanǵa laiyqty mekemeler áli de boi kóterip, jańa ǵimarattardyń sany kóbeiýde. Óziniń basqa shaharlarǵa uqsamaityndyǵymen erekshelenip turǵan qalada taǵy bir jańa ǵimarat boi kóterip, kópshiliktiń qýanyshyn eselete tústi.
Jańa nysan Taldyqorǵan qalasynyń 7-yqsham aýdanynda boi kóterdi. Eki qabattan turatyn ǵimarattyń jalpy aýdany 10 538 sharshy metr. Kórermen orny 510 adamǵa laiyqtalǵan.
Jetisýlyq ónersúier qaýymdy aitýly oqiǵamen quttyqtaǵan Amandyq Ǵabbasuly:
– Taldyqorǵan jyl ótken saiyn qanatyn keńge jaiyp, gúldenip keledi Halyqtyń sany da artyp, Taldyqorǵandy turǵylyqty jeri retinde tańdaýshylar qatary da kóbeigen.
Shaharda jańa turǵynjai oramdarymen birge, áleýmettik-mádeni nysandar da salynýda. Jańa nysan oblys ortalyǵynyń ajaryn ashyp, túrlendire tústi.
Qala turǵyndary jáne óz atymnan biregei nysandy iske asyrýǵa qatysqan kórnekti sáýletshilerge, dizainerler men qurylysshylarǵa, kúni men túni osy halyqaralyq teatrlar festivaliniń ashylýy úshin ilgeri jumys istep júrgen azamattarǵa alǵys bildiremin. Birlesken eńbek pen shyǵarmashylyq izdenistiń kópten kútken nátijesi osy klassikalyq dástúr men qazirgi zamannyń talaptaryn úilestiretin sáýlet óneriniń jaýhary, – dedi.
Sondai-aq, ol jańa óner ordasynyń boi kóterýine Elbasy Nursultan Nazarbaevtyń zor qamqorlyǵynyń arqasynda qol jetkizilip otyrǵanyn aityp ótti.
– Qurmetti dostar, búgin biz úshin qos mereke. Jetisý astanasynda osyndai tamasha teatrdyń ashylýy jáne Ortalyq Aziia elderiniń VII Halyqaralyq teatr festivaliniń bastalýy. Teatr men kino kún saiyn damyp keledi, munyń bári sizder úshin, halyq úshin. Dramalyq teatrǵa eń bastysy-kórermenderdiń tanymy men mahabbatyn tileimin! – dedi Asanáli Áshimov.
Teatrdyń ashylýy Orta Aziia elderiniń 7-shi Halyqaralyq teatr festivalimen tuspa-tus kelip otyr. Festivalde Qazaqstan, Qyrǵyzstan, Túrkimenstan, Bashqurtstan, Ózbekstan, Túrkiia elderiniń teatrlarynyń 11 qoiylymy kórermen nazaryna usynylady.
Aita keteiik, atalmysh festival Biken Rimova atyndaǵy drama teatrynyń jańa jáne eski ǵimaratynda ótedi.
Qoiylymdardy Taldyqorǵan qalasynyń turǵyndary men qonaqtary tegin tamashalai alady.
Baljan Qairatqyzy,
Almaty oblysy
https://youtu.be/D9mDWL7l8Cg
