قايتا ومىرگە كەلگەندەي جاسارىپ، جاڭارعان قالادا زامانعا لايىقتى مەكەمەلەر ءالى دە بوي كوتەرىپ، جاڭا عيماراتتاردىڭ سانى كوبەيۋدە. ءوزىنىڭ باسقا شاھارلارعا ۇقسامايتىندىعىمەن ەرەكشەلەنىپ تۇرعان قالادا تاعى ءبىر جاڭا عيمارات بوي كوتەرىپ، كوپشىلىكتىڭ قۋانىشىن ەسەلەتە ءتۇستى.
جاڭا نىسان تالدىقورعان قالاسىنىڭ 7-ىقشام اۋدانىندا بوي كوتەردى. ەكى قاباتتان تۇراتىن عيماراتتىڭ جالپى اۋدانى 10 538 شارشى مەتر. كورەرمەن ورنى 510 ادامعا لايىقتالعان.
جەتىسۋلىق ونەرسۇيەر قاۋىمدى ايتۋلى وقيعامەن قۇتتىقتاعان اماندىق عابباس ۇلى:
– تالدىقورعان جىل وتكەن سايىن قاناتىن كەڭگە جايىپ، گۇلدەنىپ كەلەدى حالىقتىڭ سانى دا ارتىپ، تالدىقورعاندى تۇرعىلىقتى جەرى رەتىندە تاڭداۋشىلار قاتارى دا كوبەيگەن.
شاھاردا جاڭا تۇرعىنجاي ورامدارىمەن بىرگە، الەۋمەتتىك-مادەني نىساندار دا سالىنۋدا. جاڭا نىسان وبلىس ورتالىعىنىڭ اجارىن اشىپ، تۇرلەندىرە ءتۇستى.
قالا تۇرعىندارى جانە ءوز اتىمنان بىرەگەي نىساندى ىسكە اسىرۋعا قاتىسقان كورنەكتى ساۋلەتشىلەرگە، ديزاينەرلەر مەن قۇرىلىسشىلارعا، كۇنى مەن ءتۇنى وسى حالىقارالىق تەاترلار فەستيۆالىنىڭ اشىلۋى ءۇشىن ىلگەرى جۇمىس ىستەپ جۇرگەن ازاماتتارعا العىس بىلدىرەمىن. بىرلەسكەن ەڭبەك پەن شىعارماشىلىق ىزدەنىستىڭ كوپتەن كۇتكەن ناتيجەسى وسى كلاسسيكالىق ءداستۇر مەن قازىرگى زاماننىڭ تالاپتارىن ۇيلەستىرەتىن ساۋلەت ونەرىنىڭ جاۋھارى، – دەدى.
سونداي-اق، ول جاڭا ونەر ورداسىنىڭ بوي كوتەرۋىنە ەلباسى نۇرسۇلتان نازاربايەۆتىڭ زور قامقورلىعىنىڭ ارقاسىندا قول جەتكىزىلىپ وتىرعانىن ايتىپ ءوتتى.
سالتاناتتى شارانىڭ اشىلۋىمەن كسرو حالىق ءارتىسى، مەملەكەتتىك سىيلىقتىڭ لاۋرەاتى، قازاقستان تەاترلارى اسسوساسياسىنىڭ ءتوراعاسى ءاسانالى ءاشىموۆ پەن ەلىمىزگە بەلگىلى تەاتر جانە كينو سالاسىنىڭ قايراتكەرلەرى قۇتتىقتاپ جۇرەكجاردى اق تىلەكتەرىن جەتكىزدى.
– قۇرمەتتى دوستار، بۇگىن ءبىز ءۇشىن قوس مەرەكە. جەتىسۋ استاناسىندا وسىنداي تاماشا تەاتردىڭ اشىلۋى جانە ورتالىق ازيا ەلدەرىنىڭ VII حالىقارالىق تەاتر فەستيۆالىنىڭ باستالۋى. تەاتر مەن كينو كۇن سايىن دامىپ كەلەدى، مۇنىڭ ءبارى سىزدەر ءۇشىن، حالىق ءۇشىن. درامالىق تەاترعا ەڭ باستىسى-كورەرمەندەردىڭ تانىمى مەن ماحابباتىن تىلەيمىن! – دەدى ءاسانالى ءاشىموۆ.
تەاتردىڭ اشىلۋى ورتا ازيا ەلدەرىنىڭ 7ء-شى حالىقارالىق تەاتر فەستيۆالىمەن تۇسپا-تۇس كەلىپ وتىر. فەستيۆالدە قازاقستان، قىرعىزستان، تۇركىمەنستان، باشقۇرتستان، وزبەكستان، تۇركيا ەلدەرىنىڭ تەاترلارىنىڭ 11 قويىلىمى كورەرمەن نازارىنا ۇسىنىلادى.
مادەني شارا ورتالىق ازيا ەلدەرى مەن قازاقستاننىڭ تەاتر ونەرى سالاسىنداعى ارىپتەستىكتى نىعايتۋ، تەاتر ونەرىن دامىتۋ جانە وسى سالا ماماندارىن شىعارماشىلىق باستامالارعا ىنتالاندىرۋ، سونداي-اق جۇرتشىلىقتىڭ نازارىن تەاتر ءۇردىسىنىڭ جاڭا، زاماناۋي ۇلگىلەرىنە اۋدارۋ ماقساتىندا وتكىزىلەدى.
ايتا كەتەيىك، اتالمىش فەستيۆال بيكەن ريموۆا اتىنداعى دراما تەاترىنىڭ جاڭا جانە ەسكى عيماراتىندا وتەدى.
قويىلىمداردى تالدىقورعان قالاسىنىڭ تۇرعىندارى مەن قوناقتارى تەگىن تاماشالاي الادى.
بالجان قايرات قىزى،
الماتى وبلىسى
https://youtu.be/D9mDWL7l8Cg
