Taıaýda Taldyqorǵan qalasynda «Belsendi uzaq ómir súrý ortalyǵy» jumysyn bastady. Ortalyqtyń negizgi maqsaty – zeınet jasyndaǵy adamdardy áleýmettendirý, olardy belsendi mádenı-shyǵarmashylyq, sporttyq jáne iskerlik ómirge tartý, olardyń fızıkalyq jáne psıhologıalyq saýlyǵyna yqpal etý arqyly ómir súrý uzaqtyǵyn arttyrý, – dep habarlaıdy Dalanews.kz.
Mundaı ortalyq qalada buryn da bolǵan, biraq onyń jumysyn júrgizip, damytý úshin qoǵamdyq uıymdar arasynda konkýrs oınatylatyn. Endi ortalyq komýnaldyq memlekettik mekeme formatynda qaıta ashylyp otyr, qazir onyń qýaty 2 esege artyp, 220 orynǵa laıyqtalǵan.
Ortalyq kelýshilerdiń suranysy men qyzyǵýshylyǵyna qaraı 12 qyzmet túrin tegin kórsetip, 38 qyzmetkerdi jumyspen qamtyp otyr. Qarjylyq jáne kompúterlik saýattylyq, aǵylshyn tili, qazaq tili, toqý jáne tigin kýrstaryn uıymdastyrdyq, sport zaly bar, ıoga, vokal, shahmat-doıby, ústel tenısi boıynsha sabaqtar ótedi. Qazir ortalyqqa yńǵaıly ýaqytta 210-nan astam adam keledi. Qazir baseınge barý máselesi sheshilýde. Aldaǵy ýaqytta ashyq aspan astynda is-sharalar, saıahattar ótkizýdi josparlap otyr. Ol úshin 16 oryndyq avtobýs satyp alyndy.
Atap ótsek, ortalyqty damytýǵa 2024 jylǵa 300 mıllıon teńge bólingen. Búgingi kúni ortalyq 16 oryndy shaǵyn avtobýs, trenajerlar, gantelder, júgirý joly, jattyǵýǵa arnalǵan quraldar, qabyrǵa tirekteri, gımnastıkalyq doptar, ústel tenısi, shahmat, doıby, toǵyz qumalaq oınaýǵa arnalǵan qural-jabdyqtar, tigin mashınalary, toqyma jıyntyqtary, massaj kreslolary, jyljymaly proektorlarǵa arnalǵan ekrandar, stereo júıe, proektorlar, marker taqtalary jáne t.b. qajettilikter satyp alynǵan. Ǵımarattyń jalpy aýdany 1349,8 m2.
Birinshi qabatta oqý sabaqtaryn ótkizýge arnalǵan oryndar, medbıke buryshy, massajdyq oryndyq, al ekinshi qabatta sport zaly, vokaldyq jattyǵý bólmesi, shahmat, doıby, tenıs oınaýǵa arnalǵan ústelder, tigin buryshy jáne t.b. bar. Barlyq qyzmetter tegin kórsetiletin ortalyqqa Taldyqorǵannyń zeınetke shyqqan kez kelgen turǵyny kele alady. Kelýshiler jeke basyn kýálandyratyn qujat pen zeınetker kýáligin kórsetýi kerek.
«Belsendi uzaq ómir súrý ortalyǵy» KMM Taldyqorǵan qalasy, Jeltoqsan kóshesi, 259 úı mekenjaıynda ornalasqan.
