تاياۋدا تالدىقورعان قالاسىندا «بەلسەندى ۇزاق ءومىر ءسۇرۋ ورتالىعى» جۇمىسىن باستادى. ورتالىقتىڭ نەگىزگى ماقساتى – زەينەت جاسىنداعى ادامداردى الەۋمەتتەندىرۋ، ولاردى بەلسەندى مادەني-شىعارماشىلىق، سپورتتىق جانە ىسكەرلىك ومىرگە تارتۋ، ولاردىڭ فيزيكالىق جانە پسيحولوگيالىق ساۋلىعىنا ىقپال ەتۋ ارقىلى ءومىر ءسۇرۋ ۇزاقتىعىن ارتتىرۋ، – دەپ حابارلايدى Dalanews.kz.
مۇنداي ورتالىق قالادا بۇرىن دا بولعان، ءبىراق ونىڭ جۇمىسىن جۇرگىزىپ، دامىتۋ ءۇشىن قوعامدىق ۇيىمدار اراسىندا كونكۋرس ويناتىلاتىن. ەندى ورتالىق كوممۋنالدىق مەملەكەتتىك مەكەمە فورماتىندا قايتا اشىلىپ وتىر، ءقازىر ونىڭ قۋاتى 2 ەسەگە ارتىپ، 220 ورىنعا لايىقتالعان.
ورتالىق كەلۋشىلەردىڭ سۇرانىسى مەن قىزىعۋشىلىعىنا قاراي 12 قىزمەت ءتۇرىن تەگىن كورسەتىپ، 38 قىزمەتكەردى جۇمىسپەن قامتىپ وتىر. قارجىلىق جانە كومپيۋتەرلىك ساۋاتتىلىق، اعىلشىن ءتىلى، قازاق ءتىلى، توقۋ جانە تىگىن كۋرستارىن ۇيىمداستىردىق، سپورت زالى بار، يوگا، ۆوكال، شاحمات-دويبى، ۇستەل تەننيسى بويىنشا ساباقتار وتەدى. ءقازىر ورتالىققا ىڭعايلى ۋاقىتتا 210-نان استام ادام كەلەدى. ءقازىر باسسەينگە بارۋ ماسەلەسى شەشىلۋدە. الداعى ۋاقىتتا اشىق اسپان استىندا ءىس-شارالار، ساياحاتتار وتكىزۋدى جوسپارلاپ وتىر. ول ءۇشىن 16 ورىندىق اۆتوبۋس ساتىپ الىندى.
اتاپ وتسەك، ورتالىقتى دامىتۋعا 2024 جىلعا 300 ميلليون تەڭگە بولىنگەن. بۇگىنگى كۇنى ورتالىق 16 ورىندى شاعىن اۆتوبۋس، ترەناجەرلار، گانتەلدەر، جۇگىرۋ جولى، جاتتىعۋعا ارنالعان قۇرالدار، قابىرعا تىرەكتەرى، گيمناستيكالىق دوپتار، ۇستەل تەننيسى، شاحمات، دويبى، توعىز قۇمالاق ويناۋعا ارنالعان قۇرال-جابدىقتار، تىگىن ماشينالارى، توقىما جيىنتىقتارى، ماسساج كرەسلولارى، جىلجىمالى پروەكتورلارعا ارنالعان ەكراندار، ستەرەو جۇيە، پروەكتورلار، ماركەر تاقتالارى جانە ت.ب. قاجەتتىلىكتەر ساتىپ الىنعان. عيماراتتىڭ جالپى اۋدانى 1349،8 م2.
ءبىرىنشى قاباتتا وقۋ ساباقتارىن وتكىزۋگە ارنالعان ورىندار، مەدبيكە بۇرىشى، ماسساجدىق ورىندىق، ال ەكىنشى قاباتتا سپورت زالى، ۆوكالدىق جاتتىعۋ بولمەسى، شاحمات، دويبى، تەننيس ويناۋعا ارنالعان ۇستەلدەر، تىگىن بۇرىشى جانە ت.ب. بار. بارلىق قىزمەتتەر تەگىن كورسەتىلەتىن ورتالىققا تالدىقورعاننىڭ زەينەتكە شىققان كەز كەلگەن تۇرعىنى كەلە الادى. كەلۋشىلەر جەكە باسىن كۋالاندىراتىن قۇجات پەن زەينەتكەر كۋالىگىن كورسەتۋى كەرەك.
«بەلسەندى ۇزاق ءومىر ءسۇرۋ ورتالىعى» كمم تالدىقورعان قالاسى، جەلتوقسان كوشەسى، 259 ءۇي مەكەنجايىندا ورنالاسقان.
