Taldyqorǵan. Qala kúninde sý jańa gazben júretin jańa avtobýstar paidalanýǵa berildi
– Qala kúnine orai taldyqorǵandyqtardy tiimdi syilyq – jolaýshy tasymalyna jańa avtobýs shyǵarý arqyly qýantýdy oilastyrdyq. Bul óte mańyzdy mindet dep bilemin. Óitkeni, jolaýshy tasymaldaityn kompaniialardyń avtoparkterin jańartýǵa múmkindigi joq bolatyn. Biz olarǵa «Jetisý» áleýmettik kásipkerlik korporatsiiasy arqyly 2,3 milliard teńgeden astam qarjyǵa avtobýs satyp alyp, lizingke berip otyrmyz. Bul avtobýstardyń eń basty ereksheligi – taza tabiǵi ónim gazben júretindiginde. Ol úshin qalada arnaiy gaz toltyratyn kompressorlyq stansy turǵyzdyq. Jergilikti biýdjettiń esebinen túrli deńgeidegi jolaýshylar – mektep oqýshylarynyń, stýdentterdiń, ardagerler men basqa da kóptegen jolaýshynyń tegin júrýine jaǵdai jasap otyrmyz. Munyń bári halyq úshin. Taǵy da merekelerińizben quttyqtai otyryp, barsha jaqsylyqty tileimin, – degen oblys ákimi Amandyq Batalov.
Keiin turǵyndardyń atynan sóz alǵan Taldyqorǵan qalasynyń Qurmetti azamaty Murat Halyq qalanyń 20 jyldyń ishindegi kórkeiýine toqtaldy.
– Meniń Taldyqorǵanda turyp jatqanyma 67 jyl boldy. Ol kezde barlyǵy 14 kóshesi bar shaǵyn ǵana qala edi. Bar-joǵy 18-20 myń turǵyny bolatyn. Búgingi qalanyń qalai óskenine qarańyzshy, Jetisý jeriniń ákimshilik ortalyǵy bolǵan 20 jyldyń ishinde kórkeiip, damyp, ulǵaiyp, ósti. Osy ózgeristerdiń bári meniń kóz aldymda ótti. Taldyqorǵannyń tarihy qyzyqty, mádenieti tereń. Oǵan árbir turǵyn óz úlesin qosyp keledi. Endeshe, súiikti shaharymyz ósip-ónip, kórkeie bersin, gúldensin dep tileiik. Zamanaýi kelbetin bárimiz jaqsy kóre bereiik, – degen ardager kópshilikti qala kúnimen quttyqtap, aqsaqaldyq batasyn berdi.
Jańa avtobýstar paidalanýǵa berilip, baǵyttarǵa shyǵarylǵan soń qala qonaqtary men turǵyndar zamanaýi kólikterdiń múmkindigi men ereksheligimen tanysty. Qala turǵyndarynyń kópshiligi áleýmettik jelilerge alǵan áserlerin bólisip, arnaiy jazba qaldyrýda.
Oblystyq ákimshilik ortalyqtyń Taldyqorǵan qalasyna aýysýyna 20 jyl tolýyna arnalǵan sharalar aiasynda qalalyq avtoparkke «Iýtong» jáne PAZ markaly 32 avtobýs berildi. Odan bólek, jyl sońyna deiin taǵy 23 avtobýs qalaǵa keledi. Syiymdylyǵy 55-ten 67 adamǵa deiin jetetin jańa avtobýstarǵa beinebaqylaý kameralary, konditsioner, elektrli bilet berý qurylǵysy ornatylyp, múmkindigi shekteýli jandarǵa arnalǵan oryndar qarastyrylǵan. Jalpy, jergilik biýdjettiń esebinen jolaýshy tasymalymen ainalysatyn kompaniialardy qoldaý jalǵasa túsedi. Aldaǵy 3 jyldyń ishinde 3,2 milliard teńgeden astam sýbsidiia berý josparlanǵan.
