Aýyl sharýashylyǵy mınıstri Aıdarbek Saparov Qazaqstandaǵy sıyr etiniń ishki jáne eksporttaǵy baǵasyn atady, dep habarlaıdy Dalanews.kz.

Mınıstrdiń aıtýynsha, qazirgi ýaqytta ishki naryqta iri qara maldyń kılogramy 1,6–1,8 myń teńge aralyǵynda satylyp jatyr. Buryn bul kórsetkish 2 myń teńgege deıin kóterilgen edi, al qazir ortasha baǵa shamamen 1,7 myń teńge deńgeıinde qalyptasqan.

Onyń sózinshe, ishki naryqtaǵy kóterme qun kılogramyna shamamen 3–4 myń teńgeni quraıdy.

Sonymen qatar Saparov mal sharýashylyǵyn jedel damytý úshin fermerler eksporttyq baǵa áldeqaıda joǵary bolýy kerek dep esepteıtinin aıtty. Agrarshylardyń pikirinshe, tıimdi eksporttyq baǵa kılogramyna 10–12 myń teńge deńgeıinde bolýy tıis.

Alaıda mınıstrdiń málimetinshe, qazirgi naqty eksporttyq baǵa ettiń sanaty men maldyń qońdylyǵyna qaraı 4,5 myńnan 6 myń teńgege deıin ózgerip otyr.