ShQO ákimi Danial Ahmetov aýdanǵa arnaiy kelip, alynǵan úilerdi aralap, jeke ózi tekserip shyqty. Halyqtyń qýanyshyna ortaqtasqan aimaq basshysy tartýyn da jasap, ár shańyraqqa teledidardan tabys etti.
Esterińizge sala ketsek, naýryzdyń 11 kúni Aiagóz qalasynda kishi ózen sýy arnasynan asyp, nátijesinde 189 úi zardap shekken edi. Segizi qirap, jalpy sany 32 úi búginde múlde turýǵa jaramsyz dep tanyldy. ShQO ákimi Danial Ahmetov tapsyrmasy boiynsha bir apta ishinde 49 mln 500 teńgege 12 úi satylyp alynyp, qujattary resimdeldi.
– Men kelgende 8 úi qulap jatqan. Taǵy 10 shaqty úi buzylyp turǵan bolatyn. Qazir olar da qirap qaldy. Komissiia jumysynyń qorytyndysy 40 shaqty páterdi apatty jaǵdaida dep tanyp otyr. Ol úilerdiń ielerine de qarajat bólip, baspana beremiz, – dedi oblys ákimi Danial Ahmetov.
Aita ketý kerek, aýdanǵa búginde 34 mln 255 myń teńgege gýmanitarlyq kómek kórsetildi. Sonaý Atyraý, Almaty, Pavlodar oblystarynan da azyq-túlikpen qatar, qurylys materialdary jetkizildi.
Budan bólek, Shyǵys Qazaqstannyń «Paryz» qorynan joldanǵan 100 mln teńgeni qosqanda «Aiagóz Bolashaq» QQ 169 mln teńge tústi. Jinalǵan bar qarajat pen gýmanitarlyq qordy qoǵam belsendileriniń qatań baqylaýymen tek maqsatty iske jumsaýdy tapsyrdy Danial Ahmetov. Óz kezeginde aiagózdikter az ýaqyt ishinde atqarylǵan jumysqa, ásirese kúlli Qazaqstan halqynyń aýyzbirshiligine rizashylyǵyn bildirdi.
Aimaq basshysy Danial Ahmetov Aiagóz qalasynyń áleýmettik-ekonomikalyq damýyna serpin berilip, aldaǵy tańda infraqurylymyn jańartý jumysy aiaqtalyp, sý máselesi túbegeili sheshiletinin jetkizdi.
ShQO ákiminiń baspasóz qyzmeti
