SHQO ákimi Danıal Ahmetov aýdanǵa arnaıy kelip, alynǵan úılerdi aralap, jeke ózi tekserip shyqty. Halyqtyń qýanyshyna ortaqtasqan aımaq basshysy tartýyn da jasap, ár shańyraqqa teledıdardan tabys etti.
Esterińizge sala ketsek, naýryzdyń 11 kúni Aıagóz qalasynda kishi ózen sýy arnasynan asyp, nátıjesinde 189 úı zardap shekken edi. Segizi qırap, jalpy sany 32 úı búginde múlde turýǵa jaramsyz dep tanyldy. SHQO ákimi Danıal Ahmetov tapsyrmasy boıynsha bir apta ishinde 49 mln 500 teńgege 12 úı satylyp alynyp, qujattary resimdeldi.
– Men kelgende 8 úı qulap jatqan. Taǵy 10 shaqty úı buzylyp turǵan bolatyn. Qazir olar da qırap qaldy. Komısıa jumysynyń qorytyndysy 40 shaqty páterdi apatty jaǵdaıda dep tanyp otyr. Ol úılerdiń ıelerine de qarajat bólip, baspana beremiz, – dedi oblys ákimi Danıal Ahmetov.
Aıta ketý kerek, aýdanǵa búginde 34 mln 255 myń teńgege gýmanıtarlyq kómek kórsetildi. Sonaý Atyraý, Almaty, Pavlodar oblystarynan da azyq-túlikpen qatar, qurylys materıaldary jetkizildi.
Budan bólek, Shyǵys Qazaqstannyń «Paryz» qorynan joldanǵan 100 mln teńgeni qosqanda «Aıagóz Bolashaq» QQ 169 mln teńge tústi. Jınalǵan bar qarajat pen gýmanıtarlyq qordy qoǵam belsendileriniń qatań baqylaýymen tek maqsatty iske jumsaýdy tapsyrdy Danıal Ahmetov. Óz kezeginde aıagózdikter az ýaqyt ishinde atqarylǵan jumysqa, ásirese kúlli Qazaqstan halqynyń aýyzbirshiligine rızashylyǵyn bildirdi.
– Siz, tabıǵat apaty bastalǵannan beri ekinshi ret kelip tursyz. Bir apta ishinde talaı sharýa tyndyryldy. Halyq ta kýá. Apatqa ushyraǵandardyń kóńil-kúıi jaqsy. Bárimiz jylap júr edik, qazir kúlip júrmiz. Jan-jaqtan azyq-túlik, kıim-keshek, qurylys materıaldary kelip jatyr. Myń da bir rahmet! Munyń bári Elbasy bastaǵan birliktiń jemisi. Sizge Aıagóz turǵyndarynyń atynan ótinishimiz bar. Prezıdentimiz Nursultan Ábishuly Nazarbaevqa ózimizdiń rızashylyǵymyzdy, rahmetimizdi jetkizseńiz, – dep, apattan zardap shekken Aıagóz qalasynyń turǵyny Merýert Daýytbaeva aqjarma tilegin joldady.
Aımaq basshysy Danıal Ahmetov Aıagóz qalasynyń áleýmettik-ekonomıkalyq damýyna serpin berilip, aldaǵy tańda ınfraqurylymyn jańartý jumysy aıaqtalyp, sý máselesi túbegeıli sheshiletinin jetkizdi.
SHQO ákiminiń baspasóz qyzmeti
