شقو اكىمى دانيال احمەتوۆ اۋدانعا ارنايى كەلىپ، الىنعان ۇيلەردى ارالاپ، جەكە ءوزى تەكسەرىپ شىقتى. حالىقتىڭ قۋانىشىنا ورتاقتاسقان ايماق باسشىسى تارتۋىن دا جاساپ، ءار شاڭىراققا تەلەديداردان تابىس ەتتى.
ەستەرىڭىزگە سالا كەتسەك، ناۋرىزدىڭ 11 كۇنى اياگوز قالاسىندا كىشى وزەن سۋى ارناسىنان اسىپ، ناتيجەسىندە 189 ءۇي زارداپ شەككەن ەدى. سەگىزى قيراپ، جالپى سانى 32 ءۇي بۇگىندە مۇلدە تۇرۋعا جارامسىز دەپ تانىلدى. شقو اكىمى دانيال احمەتوۆ تاپسىرماسى بويىنشا ءبىر اپتا ىشىندە 49 ملن 500 تەڭگەگە 12 ءۇي ساتىلىپ الىنىپ، قۇجاتتارى رەسىمدەلدى.
– مەن كەلگەندە 8 ءۇي قۇلاپ جاتقان. تاعى 10 شاقتى ءۇي بۇزىلىپ تۇرعان بولاتىن. ءقازىر ولار دا قيراپ قالدى. كوميسسيا جۇمىسىنىڭ قورىتىندىسى 40 شاقتى پاتەردى اپاتتى جاعدايدا دەپ تانىپ وتىر. ول ۇيلەردىڭ يەلەرىنە دە قاراجات ءبولىپ، باسپانا بەرەمىز، – دەدى وبلىس اكىمى دانيال احمەتوۆ.
ايتا كەتۋ كەرەك، اۋدانعا بۇگىندە 34 ملن 255 مىڭ تەڭگەگە گۋمانيتارلىق كومەك كورسەتىلدى. سوناۋ اتىراۋ، الماتى، پاۆلودار وبلىستارىنان دا ازىق-تۇلىكپەن قاتار، قۇرىلىس ماتەريالدارى جەتكىزىلدى.
بۇدان بولەك، شىعىس قازاقستاننىڭ «پارىز» قورىنان جولدانعان 100 ملن تەڭگەنى قوسقاندا «اياگوز بولاشاق» قق 169 ملن تەڭگە ءتۇستى. جينالعان بار قاراجات پەن گۋمانيتارلىق قوردى قوعام بەلسەندىلەرىنىڭ قاتاڭ باقىلاۋىمەن تەك ماقساتتى ىسكە جۇمساۋدى تاپسىردى دانيال احمەتوۆ. ءوز كەزەگىندە اياگوزدىكتەر از ۋاقىت ىشىندە اتقارىلعان جۇمىسقا، اسىرەسە كۇللى قازاقستان حالقىنىڭ اۋىزبىرشىلىگىنە ريزاشىلىعىن ءبىلدىردى.
– ءسىز، تابيعات اپاتى باستالعاننان بەرى ەكىنشى رەت كەلىپ تۇرسىز. ءبىر اپتا ىشىندە تالاي شارۋا تىندىرىلدى. حالىق تا كۋا. اپاتقا ۇشىراعانداردىڭ كوڭىل-كۇيى جاقسى. ءبارىمىز جىلاپ ءجۇر ەدىك، ءقازىر كۇلىپ ءجۇرمىز. جان-جاقتان ازىق-تۇلىك، كيىم-كەشەك، قۇرىلىس ماتەريالدارى كەلىپ جاتىر. مىڭ دا ءبىر راحمەت! مۇنىڭ ءبارى ەلباسى باستاعان بىرلىكتىڭ جەمىسى. سىزگە اياگوز تۇرعىندارىنىڭ اتىنان ءوتىنىشىمىز بار. پرەزيدەنتىمىز نۇرسۇلتان ءابىش ۇلى نازاربايەۆقا ءوزىمىزدىڭ ريزاشىلىعىمىزدى، راحمەتىمىزدى جەتكىزسەڭىز، – دەپ، اپاتتان زارداپ شەككەن اياگوز قالاسىنىڭ تۇرعىنى مەرۋەرت داۋىتبايەۆا اقجارما تىلەگىن جولدادى.
ايماق باسشىسى دانيال احمەتوۆ اياگوز قالاسىنىڭ الەۋمەتتىك-ەكونوميكالىق دامۋىنا سەرپىن بەرىلىپ، الداعى تاڭدا ينفراقۇرىلىمىن جاڭارتۋ جۇمىسى اياقتالىپ، سۋ ماسەلەسى تۇبەگەيلى شەشىلەتىنىن جەتكىزدى.
شقو اكىمىنىڭ باسپا ءسوز قىزمەتى
