Tarbaǵatai aýdanynyń ortalyǵy – Aqjar aýylynda zamanaýi dene shynyqtyrý-saýyqtyrý kesheni paidalanýǵa berildi. «Aýyl – el besigi» memlekettik baǵdarlamasy aiasynda salynǵan nysan aýyl turǵyndaryn sapaly sport infraqurylymymen qamtyp, buqaralyq sportty damytýǵa baǵyttalǵan, dep habarlaidy dalanews.kz.
Bul – sońǵy ýaqytta Tarbaǵatai aýdanynda el igiligine berilgen ekinshi iri sport nysany. Jalpy aýmaǵy 1284,20 sharshy metrdi quraityn keshen bir aýysymda 47 adamdy qabyldai alady. Munda basketbol, voleibol, shaǵyn fýtbol, tennis, badminton, boks, qazaq kúresi jáne aýyr atletikamen ainalysýǵa barlyq múmkindik jasalǵan.
Sport zaldary qajetti qural-jabdyqtarmen tolyq jabdyqtalǵan. Sonymen qatar, ǵimaratta jýyný jáne kiim aýystyrý bólmeleri, dáriger kabineti, jattyqtyrýshylarǵa arnalǵan arnaiy bólmeler qarastyrylǵan.
Jańa sport kesheniniń ashylý saltanatyna qatysqan Shyǵys Qazaqstan oblysynyń ákimi Nurymbet Saqtaǵanov óńirde buqaralyq sportty damytý baǵytyndaǵy jumystar júieli túrde jalǵasyp jatqanyn aitty.
– Qurmetti qonaqtar, ardaqty sport ardagerleri, jastar! Eń birinshi bailyq – densaýlyq. Al densaýlyqtyń basty kepili – sport. Búginde Shyǵys Qazaqstan oblysynyń áleýmettik-ekonomikalyq kórsetkishteri turaqty ósip keledi. Bul – memlekettik jáne óńirlik baǵdarlamalardyń tiimdi júzege asyrylýynyń, sondai-aq eńbekqor, birligi jarasqan halyqtyń qajyrly eńbeginiń nátijesi.
Osyndai jetistikterdiń negizinde myqty densaýlyq turýy kerek. Sondyqtan Memleket basshysy Qasym-Jomart Toqaevtyń buqaralyq sportty damytý jónindegi tapsyrmasy aiasynda oblysta aýqymdy jumystar atqarylyp keledi. Qazirgi tańda oblys turǵyndarynyń 45 paiyzy dene shynyqtyrýmen jáne sportpen turaqty ainalysady. Búgin ashylyp otyrǵan keshen – sol jumystyń naqty nátijesi. Osy qýanyshty kúnmen barshańyzdy shyn júrekten quttyqtaimyn! – dedi oblys ákimi.
Aimaq basshysy jastarǵa arnaiy úndeý jasap, sport pen bilimdi qatar alyp júrýdiń mańyzyn atap ótti.
– Munda bolashaq chempiondarymyz otyr. Sizderge aitarym – erinbei, talmai sportpen shuǵyldanyńyzdar. Biraq eń aldymen sabaqty umytpańyzdar. «Deni saýdyń – jany saý» deidi halqymyz. Sizder el maqtan tutar azamat bolyp ósýlerińiz kerek.
Búginde oblystyń qyzdar jáne uldar voleibol komandalary joǵary ligada tabysty óner kórsetip júr. Shyǵys Qazaqstan – hokkeidiń altyn besigi. Fýtboldan da 13 jyldan keiin Premer-ligaǵa joldama alǵan «Altai» komandasy jaqsy nátijeler kórsetýde.
Al Tarbaǵatai dese, eń aldymen voleibolshylardyń jeńisi eske túsedi. Sondyqtan búgin ashylǵan bul keshennen tek voleibol ǵana emes, ózge de sport túrlerinen aýdannyń atyn shyǵaratyn daryndy sportshylar ósip shyǵady dep senemin. Balalarymyz júzden júirik, myńnan tulpar atansyn! – dedi Nurymbet Saqtaǵanov.
Aýyl aqsaqaly Qurmantai Núsipuly aq batasyn berip, odan keiin sport kesheniniń lentasy saltanatty túrde qiyldy.
Sapar barysynda oblys ákimi sport nysany ujymyna jańa shaǵyn avtobýstyń kiltin tabys etti. Sondai-aq, keshenniń trenajer, boks jáne sport zaldaryn aralap kórip, jas sportshylarmen kezdesti. Aýdan jastaryna basketbol, voleibol jáne fýtbol doptary syiǵa berildi.
Óńir basshysy aýyldyq aýmaqtardaǵy áleýmettik infraqurylymdy damytý jumystary aldaǵy ýaqytta da jalǵasatynyn jetkizdi.
