Týrizm jáne sport ministri Erbol Myrzabosynov "sportshylardyń dinshildigine kózqarasyńyz qandai" degen suraqqa jaýap berdi, dep habarlaidy Dalanews.kz Ulysmediaǵa siltep.
Úkimet otyrysynan keiin jýrnalisterdiń biri ministrden “Olimpiada bolsyn, chempionat bolsyn sportshylar jeńse de, jeńilmese de, Allanyń qalaýymen jeńdim nemese jeńildim dep jatady, sportshylardyń dinshildigine bailanysty úlken bir teris kózqarastar aitylady, olardyń din máselesin kóbirek aitýy durys emes deidi. Sportshylardyń dinshildigine kózqarasyńyz qandai?” dep surady.
Erbol Myrzabosynov bul suraqqa bergen jaýabynda din máselesi boiynsha arnaiy jol kartasy ázirlengenin, sol boiynsha jumys atqarylyp jatqanyn aitty.
Búgingi tańda arnaiy uiymdardan mamandardy tartyp, sportshylarmen de júieli jumys atqaryp jatyrmyz. Ár federatsiia buǵan jaýapty. Óziniń quramasymen jumys atqarady. Qazir jol kartasy aiasynda din máselesi boiynsha jumysty atqaryp jatyrmyz, – deidi ministr.
Týrizm jáne sport vitse-ministri Serik Jarasbaev buǵan deiin májilis qaraýynda jatqan Sport týraly zań jobasyna terrorizm men ektremizmge qarsy normalar engizilgenin málim etken edi. Atalǵan másele májiliste sport máselesi talqylanǵan kezde kóterilgen. Depýtat Jigýli Dairabaev keibir sportshylardyń saqalynyń ósip ketkenin synǵa alǵan. Ol dinge berilse, «olar meshitke baryp namaz oqysyn» dep te ótkir aitty.
Onyń bul synyna Serik Jarasbaev jaýap berdi.
Qazirgi tańda kóptegen sport túrlerinde ózińiz aityp otyrǵandai, dinniń qate aǵymyna ketip qalǵan sportshylarymyz bar, ókinishke qarai. Ony bilemiz, tizimi bar. Sport týraly zań jobasyna terrorizm men ektremizmge qarsy normalardy engizip otyrmyz. Ony depýtattar qoldady», – dedi Jarasbaev.
