Bir kún buryn Chocofamily Holding negizin qalaýshy qazaqstandyq kásipker Ramıl Mýhorápov elge kelgen reseılikter aldynda sóılegen sózinde Qazaqstanda "orys tilin bile tura" qazaq tilinde sóılegenderdi synap, muny "ultshyldyq pen mádenıetsizdiktiń belgisi" dep ataǵan.

Kásipker sózin jeli qoldanýshylary qatań synǵa alyp, kompanıanyń qyzmetin paıdalanýdan bas tartý naýqany da bastalǵan. Keıbir qoldanýshylar kompanıa saıttarynyń qazaqsha nusqasynyń joǵyna da nazar aýdarǵan.

– Bul bizdiń kemshilik. Munymyzdy aqtaı da ala almaımyz. "Ýaqyt bolmady, úlgere almadyq" dep te aıta almaımyz. Aıtqandaryńyzdyń bári durys. Endi bizdiń qolymyzdan ne keledi? Túzeý kerek. Sońǵy birneshe aıda sol boıynsha jumys istep jatyrmyz. Sol sebepti jyl sońyna deıin barlyq servıs qazaq tiline aýdarylady dep oılaımyn. Túzeýge ýáde beremiz, – dedi 20 qazanda aqparat quraldaryna túsinikteme bergen Chocofood kompanıasynyń PR menejeri Sánıa Serikova.

Aqparat quraldary odan Ramıl Mýhorápovtyń sózi jóninde de surady.

– Ramıl qatelesti. Durys sóz tańdaı almaı qatelesti. Barlyǵy muny túsinedi. Sebebi eger ol solaı oılasa, (qanshama qazaq otyr – S.S), qazaqtar onymen jumys istemeıtin edi. Qazir ol shyn júregimmen keshirim suraǵan vıdeo túsirip jatyr. Ol óziniń Instagramdaǵy paraqshasyna jarıalaıdy. Tek osyndǵaylar ǵana emes, bári kóre alýy úshin, – dedi Sánıa Serikova.

Beısenbi kúni kompanıa ókili aqparat quraldaryna suhbat bermeı turyp, belsendi Kámıla Eńsegenova Chocofood-tyń Almatydaǵy keńsesine baryp, kásipkermen kezdesýdi talap etken edi.

Onyń qolynda "Qazaqstanda oryssha sóıleýge mindetti emespin. #Sancel Chocolife, #Ramılge boıkot" degen jazýy bar plakat boldy.



– Qazaqtar "ultshyl" dedi. Oryssha bilmeıtin qazaqtar "birtúrli", "mádenıetsiz" dedi. Men mádenıetsiz emespin. Men mádenıetsiz bolsam, basqa jerge barar edim. Ramıl myrzamen kózbe-kóz sóılesýge keldim, – dedi kásipkerdiń shyǵýyn talap etken belsendi.

Oqıǵa ornynda belsendimen qatar aqparat quraldary boldy. Alaıda kásipker shyqqan joq. Onyń ornyna kompanıa ókili Sánıa Serikova jaýap bergen.

Byltyrdan beri Reseı saıasatkerleri men aqparat quraldary Qazaqstannyń aýmaqtyq tutastyǵyna, eldegi orys tiliniń ahýalyna qatysty qarama-qaıshy málimdemeler jıi jasap júr. Keıbirine Qazaqstan bıligi reaksıa da bildirgen. Qyrkúıek sońynan beri mobılızasıadan qashqan reseılikterdiń edáýir bóligi Qazaqstanǵa kelgennen keıin elde til máselesi jıi kóterilip júr.

Chocofamily Holding negizin qalaýshy, 37 jastaǵy Ramıl Mýhorápov Forbes málimetinshe, 2021 jyly Qazaqstandaǵy eń yqpaldy 50 kásipker qataryna engen.

https://dalanews.kz/news/82684-almaty-oblysy-zhasyl-yenergetikanyng