Sozaq aýdany, Sholaqqorǵan aýylyndaǵy ortalyq stadıonda 15 mamyr – Halyqaralyq otbasy kúni merekesi qarsańynda aýdan ákimdigi men «Baq nury» isker áıelder qoǵamdyq birlestiginiń uıymdastyrýymen alǵash ret qyz-kelinshekter arasynda júgirý marafony uıymdastyryldy, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Salaýatty ómir saltyn ustaný men buqaralyq sportty odan ári damytýǵa arnalǵan sharaǵa aýdan ákimi Muhıt Turysbekov arnaıy qatysyp, merekelik quttyqtaýyn jetkizdi.

Kóp jyldan beri muqtaj otbasylar men múmkindigi shekteýli jandarǵa qol ushyn sozyp, búginde óz isin dóńgeletip otyrǵan isker áıelder men otbasylyq qundylyqtardy saqtaýda kópshilikke úlgi bolyp otyrǵan kóp balaly analar jáne qyz-kelinshekterden quralǵan «Baq-nury» isker áıelder qoǵamdyq birlestiginiń aldaǵy jumystaryna sáttilik tilep, is-sharanyń mańyzdylyǵyna toqtaldy. Sonymen qatar bıyl aýdanda sport salasy boıynsha atqarylatyn josparlarymen bólisti.

Aýdandyq máslıhat depýtaty Rabıǵa Otynshıeva, «Baq-Nury» isker áıelder qoǵamdyq birlestiginiń tóraıymy Nurjamal Maıýsova salaýatty ómir saltyn ustaný maqsatynda uıymdastyrylǵan marafon qatysýshylaryna sáttilik tilep, izgi tilekterin arnady.

Aıta keteıik, aıtýly mereke qarsańynda uıymdastyrylǵan marafonǵa ár túrli qoǵamdyq is-sharalardan bólek, qaıyrymdylyq isterimen únemi aınalysyp otyratyn,  aýdanda túrli salada qyzmet etip júrgen 150-ge jýyq qyz-kelinshek qatysty.