Áskerde oryn alyp jatqan faktilerdiń barlyǵy da sebep emes, saldar. Al, sebeppen kúreste keshendi jospar men memleket deńgeıindegi aýqymdy sharalar qajet.
QR Bas Áskerı prokýrorynyń aqparatyna sáıkes sońǵy úsh jylda 237 áskerı qyzmetshi qaıtys bolǵan. (2020 jyly – 77 adam, 2021 jyly – 96 adam, 2022 jyly – 64 adam).
Olardyń 145-áskerge kelisim-shartpen kelgender, 59-ofıserler, 31- sarbazdar.
Bul azamattardyń 89-y naýqastan kóz jumǵan, 62-i jol apatynan, 50 adam sýısıdten, al 8 adam ózge sebeptermen qaıtys bolǵan. Eń kóp, ıaǵnı 89 adam aýyryp kóz jumǵan. Budan áskerge shaqyrylatyn jastardyń densaýlyǵy Otan aldyndaǵy boryshyn óteýge jaramaıdy. Jasóspirimniń tán men rýh tárbıesinde qolǵa alynýy tıis jumystar kóp ekenin kórsetedi.
Mysaly, 13-14 jastaǵy er balalardyń densaýlyǵy, tán saýlyǵy, psıhıkasy, psıhologıasy únemi baqylaýda bolýy kerek. Áskerge shaqyrý komısıasynyń aldyna kelgenshe ol balanyń búkil psıho-fızıkalyq portreti, barlyq aqparat arnaıy elektrondy kitapshada jınalyp turýy tıis. Bul aqparat ortalyqtandyrylyp tıisti platformada saqtalǵany jón.
Qazirge kezde mindettelgen kvotany toltyrý úshin ásker qataryna densaýlyǵy joq bozbalalar da ketip jatyr. Sarbazdyń psıho-fızıkalyq densaýlyq jaǵdaıy – áskerı ómirge beıimdelýde eń mańyzdy faktor. Áskerge deıingi, jasóspirim shaqtan jınalǵan, saraptalǵan aqparat sýısıdke barý, álimjettik kórsetýge beıim adamdardy erte anyqtap, kóptegen problemalardyń aldyn alar edi dep esepteımiz.
Bul problemalardyń barlyǵy áskerı mamandyq ıeleriniń abyroıyna, qoǵam aldyndaǵy mártebesine nuqsan keltiretini sózsiz.
