Álemdegi eń qýatty flot sanalatyn AQSh-tyń Áskeri-teńiz kúshteri (ÁTK) zamanaýi asimmetriialyq soǵysta kútpegen qiyndyqtarǵa tap boldy. Ormýz buǵazy úshin kúres amerika flotynyń strategiialyq mańyzy bar teńiz joldaryn baqylaýdaǵy osaldyǵyn áshkereledi. Ondaǵan jyldar boiy qalyptasqan «flot neǵurlym úlken bolsa, soǵurlym jaqsy» degen qaǵida qazirgi jańa qaýip-qaterler aldynda tiimsiz bolyp shyqty, dep habarlaidy dalanews.kz.
AQSh soqqy berý áleýeti boiynsha áli de álemde birinshi orynda turǵanymen, kemeler sany jaǵynan Qytai flotynan artta qalyp otyr. Pentagonnyń burynǵy keńesshisi Braian Klarktyń aitýynsha, amerikandyq flot ashyq muhittaǵy aýqymdy soǵystarǵa arnalǵan, sondyqtan jaǵalaý mańyndaǵy shekteýli aimaqtarda áreket etýge nashar beiimdelgen. Mysaly, quny milliardtaǵan dollar turatyn «Djerald R. Ford» siiaqty alyp aviatasyǵyshtar Irannyń jaǵalaýdan ushyrylatyn ballistikalyq zymyrandary men «Shahed» drondarynyń nysanasyna ainalýdan qorqyp, jaǵalaýdan júzdegen mil qashyqtyqta júrýge májbúr.
Iran óz flotynyń edáýir bóligi joiylǵanyna qaramastan, shaǵyn katerlerdi, teńiz minalaryn jáne arzan drondardy paidalaný arqyly strategiialyq mańyzy bar buǵazdy baqylaýda ustap otyr. Bul jaǵdai álemdik ekonomikany silkindirgen Hýsitterdiń Bab-el-Mandeb buǵazyndaǵy áreketterine uqsas. Endigi kezekte iri floty nemese tipti resmi úkimeti joq toptar da asimmetriialyq soǵys arqyly jahandyq saýda marshrýttaryn bógei alatyn deńgeige jetti. Tehnologiialyq proryv milliardtaǵan dollar turatyn kemelerdi arzan drondar men zymyrandar aldynda dármensiz etip otyr.
Qytai bul jaǵdaidan sabaq alyp, óz flotyn tehnologiialyq turǵydan jetildirýge basa nazar aýdarýda. Beijińniń keme jasaý qýaty AQSh-tan aitarlyqtai joǵary jáne olar bolashaqta jasandy intellekt, robototehnika men drondardy qoldanýda kósh bastaýdy kózdeidi. Sarapshylardyń boljamy boiynsha, aldaǵy ýaqytta teńizdegi soǵys aviatasyǵyshtar men esminetsterden ushqyshsyz basqarylatyn apparattar flotyna qarai oiysady. Sondyqtan AQSh qazirgi ýaqytta lazerlik qarý men drondarǵa qarsy júielerge investitsiia salyp, óz strategiiasyn qaita qaraýǵa májbúr bolyp otyr.
