Pavlodarda er adam anasyn aiaýsyz soqqyǵa jyǵyp, ólimine sebep boldy, dep habarlaidy dalanews.kz.
Sot málimetinshe, 6 aqpanda tańerteń Rebrovka aýylynyń 67 jastaǵy turǵyny ámiiany men telefonyn tappai, oǵan 89 jastaǵy anasyn kinálaǵan. Aradaǵy janjal sońy qatygezdikke ulasyp, er adam anasyn judyryqpen de, túrli zatpen de urǵan.
Sot-meditsinalyq saraptama nátijesinde marqumnyń basynan keminde 19 soqqy, denesinen 13 soqqy anyqtalǵan. Ol alǵan jaraqattarynan kóz jumǵan.
Aiyptalýshy kinásin jartylai moiyndap, bul áreketin "júike kúizelisine bailanysty" dep túsindirgen jáne qasaqana kisi óltirý oiy bolmaǵanyn aitqan. Sot ony 10 jylǵa bas bostandyǵynan aiyrdy.
Úkim áli zańdy kúshine engen joq.
