Ulttyq statistika biýrosy 2024 jylǵy qańtar-qyrkúiektegi demografiialyq jaǵdai týraly baiandady, dep habarlaidy Dalanews.kz.
Biýro málimetinshe, 1 qazandaǵy jaǵdai boiynsha halyq sany 20 223 218 adamdy qamtyǵan. Onyń ishinde qala turǵyndary – 12 704 977, aýyl turǵyndary – 7 518 241 adam. Sońǵy 9 aida halyqtyń jalpy ósimi 189 376 adamdy qamtydy.
2024 jyldyń 9 aiynda Qazaqstanda 278,7 myń bala dúniege kelse, qaitys bolǵandar sany – 99,5 myń adam. Osylaisha, halyqtyń tabiǵi ósimi 179,2 myń adamdy qamtydy.
Týýdyń eń joǵary deńgeii Túrkistan oblysynda (1 myń turǵynǵa – 25,04 adam), Mańǵystaý oblysynda (24,84) jáne Shymkent qalasynda (23,68) baiqaldy.
Ólim-jitimniń eń joǵary deńgeii Soltústik Qazaqstan oblysynda (1 myń turǵynǵa – 11,52), Shyǵys Qazaqstan oblysynda (11,32) jáne Qostanai oblysynda (10,12) baiqaldy. Bul osy oblystar halqynyń jas qurylymyna bailanysty.
Sonymen qatar, alǵashqy jarty jyldyń ishinde 95 myń neke qiylyp, 29,3 myń ajyrasý tirkelgen.
2024 jylǵy qańtar-qyrkúiekte elge kelgender sany 20 383 adamdy, elden ketkender sany 10 201 adamdy qamtydy. Kóshi-qon aiyrymy – 10 182 adam.
2023 jylǵy tiisti kezeńmen salystyrǵanda, Qazaqstanǵa kelgender sany 6,5% ósti, al ketkender sany 19,9% azaidy.
Eldiń negizgi kóshi-qon almasýy TMD memleketterimen júredi. TMD elderinen kelgenderdiń úlesi – 79,7%, al bul elderge ketkenderdiń úlesi – 76,9%.
El ishindegi kóshi-qon 2023 jyldyń tiisti kezeńimen salystyrǵanda 47,4% ósti. Óńiraralyq kóshi-qon boiynsha elimizdiń 4 óńirinde: Astana (52 853 adam), Almaty (26 157 adam), Shymkent (5 948 adam) qalalarynda jáne Almaty oblasynda (765 adam) halyq kóshi-qonynyń oń aiyrymy qalyptasty.
