ۇلتتىق ستاتيستيكا بيۋروسى 2024 جىلعى قاڭتار-قىركۇيەكتەگى دەموگرافيالىق جاعداي تۋرالى باياندادى، دەپ حابارلايدى Dalanews.kz.
بيۋرو مالىمەتىنشە، 1 قازانداعى جاعداي بويىنشا حالىق سانى 20 223 218 ادامدى قامتىعان. ونىڭ ىشىندە قالا تۇرعىندارى – 12 704 977، اۋىل تۇرعىندارى – 7 518 241 ادام. سوڭعى 9 ايدا حالىقتىڭ جالپى ءوسىمى 189 376 ادامدى قامتىدى.
2024 جىلدىڭ 9 ايىندا قازاقستاندا 278،7 مىڭ بالا دۇنيەگە كەلسە، قايتىس بولعاندار سانى – 99،5 مىڭ ادام. وسىلايشا، حالىقتىڭ تابيعي ءوسىمى 179،2 مىڭ ادامدى قامتىدى.
تۋۋدىڭ ەڭ جوعارى دەڭگەيى تۇركىستان وبلىسىندا (1 مىڭ تۇرعىنعا – 25،04 ادام)، ماڭعىستاۋ وبلىسىندا (24،84) جانە شىمكەنت قالاسىندا (23،68) بايقالدى.
ءولىم-جىتىمنىڭ ەڭ جوعارى دەڭگەيى سولتۇستىك قازاقستان وبلىسىندا (1 مىڭ تۇرعىنعا – 11،52)، شىعىس قازاقستان وبلىسىندا (11،32) جانە قوستاناي وبلىسىندا (10،12) بايقالدى. بۇل وسى وبلىستار حالقىنىڭ جاس قۇرىلىمىنا بايلانىستى.
سونىمەن قاتار، العاشقى جارتى جىلدىڭ ىشىندە 95 مىڭ نەكە قيىلىپ، 29،3 مىڭ اجىراسۋ تىركەلگەن.
2024 جىلعى قاڭتار-قىركۇيەكتە ەلگە كەلگەندەر سانى 20 383 ادامدى، ەلدەن كەتكەندەر سانى 10 201 ادامدى قامتىدى. كوشى-قون ايىرىمى – 10 182 ادام.
2023 جىلعى ءتيىستى كەزەڭمەن سالىستىرعاندا، قازاقستانعا كەلگەندەر سانى 6،5% ءوستى، ال كەتكەندەر سانى 19،9% ازايدى.
ەلدىڭ نەگىزگى كوشى-قون الماسۋى تمد مەملەكەتتەرىمەن جۇرەدى. تمد ەلدەرىنەن كەلگەندەردىڭ ۇلەسى – 79،7%، ال بۇل ەلدەرگە كەتكەندەردىڭ ۇلەسى – 76،9%.
ەل ىشىندەگى كوشى-قون 2023 جىلدىڭ ءتيىستى كەزەڭىمەن سالىستىرعاندا 47،4% ءوستى. ءوڭىرارالىق كوشى-قون بويىنشا ەلىمىزدىڭ 4 وڭىرىندە: استانا (52 853 ادام)، الماتى (26 157 ادام)، شىمكەنت (5 948 ادام) قالالارىندا جانە الماتى وبلاسىندا (765 ادام) حالىق كوشى-قونىنىڭ وڭ ايىرىمى قالىپتاستى.
