Joǵary aýditorlyq palatasanyń tóraǵasy Álihan Smaiylov burynǵy ádilet ministri Marat Beketaevtyń isine qatysty málimdeme jasady, - dep habarlaidy Dalanews.kz.
Onyń sózinshe, Joǵary aýditorlyq palatasy 2023 jyly Ádilet ministrliginde tekseris júrgizgen.
"2023 jylǵy memlekettik aýdit obektileriniń tizbesine sáikes, Joǵary aýditorlyq palatasy Ádilet ministrligi men onyń quramyndaǵy uiymdardyń respýblikalyq qarjyny keibir biýdjettik baǵdarlamalar boiynsha qalai qoldanǵanyn tekserý úshin aýditorlyq sharalar ótkizildi. Biz shyǵarǵan sheshim Antikorǵa berilip, osy iske qatysty keibir tulǵalar ustaldy. Ázirge basqa nárse aita almaimyn, sebebi qazirgi tańda is Antikordyń baqylaýynda", - deidi Álihan Smaiylov.
Palata tóraǵasy Beketaevtyń naqty ne úshin ustalǵanynan beihabar ekenin, biraq Joǵary aýditorlyq palatasy tekseris júrgizip, qorytyndysy Antikorǵa berilgeni fakt ekenin atap ótti.
Buǵan deiin Joǵary aýditorlyq palatasy Ádilet ministrliginde jáne "Bolashaq" konsaltingtik kompaniiasyna qarsy tekserý júrgizgenin habarlaǵan bolatynbyz. Tekserý qorytyndysy ázirge qupiia jáne qylmystyq is aiasynda materialdar tárkilendi.
Shilde aiynda Antikor Marat Beketaevqa qatysty tergeý aiaqtalǵanyn habarlady. Ol jeke kompaniianyń basshylyǵymen birge biýdjet qarajatyn asa iri mólsherde jymqyryp, alaiaqtyq jasady jáne kásipkerlik qyzmetke zańsyz qatysty degen kúdikke ilindi.
Antikor burynǵy ádilet ministrin 2023 jyldyń 21 qazanynda elden qashyp ketpek bolǵan kezinde ustaǵan edi.
Beketaev 2016-2022 jyldary ádilet ministri bolǵan. Ol qandy Qańtar oqiǵasynan soń qyzmetinen bosatylyp, keiin premer-ministrdiń keńesshisi qyzmetine taǵaiyndalǵan edi. Biraq ol keńesshi qyzmetinen bir jyldan keiin ketken.
Sonymen qatar, DALA INSIDE Báibekke qatysty eks Ádilet ministri Marat Beketaev ta tergeýshilerge biraz qundy aqparat bergenin jazǵan bolatyn. Qylmystyq is qozǵaýǵa turarlyq birshama material jinalyp qaldy.
"Qazir Baýyrjan Báibekke qylmystyq is qozǵamaq buryn, ony ekstraditsiialaý múmkin be, sol jaǵy sheshilýde. Sebebi "Jańa Qazaqstan" úshin adamdy syrtynan sottaý jaramaidy", deidi DALA INSIDE derekkózi.
Báibektiń Almatydaǵy barlyq sheshimderine reviziia jasalatyn bolady. Oǵan reviziialyq komissiia músheleri men aýditorlar jumyldyrylady dep josparlanǵan.
Sońǵy ret Baýyrjan Báibek Kipr men Germaniiada boi kórsetken edi. Negizi ol ótken jeltoqsan aiynda Soltústik Kipr aýmaǵynda júrgen deidi, derekkóz. Soltústik Kipr BUU tarapynan moiyndalmaǵan kvazimemleket. Biraq Túrkiia arqyly ekstraditsiia máselesin sheshýge bolady.
Al taǵy bir derekkóz Baýyrjan Báibektiń Afrikaǵa kósheiin dep jatqanyn málimdedi. Tanzaniiada kobalt óndirisine investitsiia salǵan qazaq kásipkerlerin jaǵalaidy degen aqparat bar. Biznesmender oǵan sál de bolsa qoldaý bildirip jiberýge ket ári emes.
