جوعارى اۋديتورلىق پالاتاسانىڭ ءتوراعاسى ءاليحان سمايىلوۆ بۇرىنعى ادىلەت ءمينيسترى مارات بەكەتايەۆتىڭ ىسىنە قاتىستى مالىمدەمە جاسادى، - دەپ حابارلايدى Dalanews.kz.
ونىڭ سوزىنشە، جوعارى اۋديتورلىق پالاتاسى 2023 جىلى ادىلەت مينيسترلىگىندە تەكسەرىس جۇرگىزگەن.
"2023 جىلعى مەملەكەتتىك اۋديت وبەكتىلەرىنىڭ تىزبەسىنە سايكەس، جوعارى اۋديتورلىق پالاتاسى ادىلەت مينيسترلىگى مەن ونىڭ قۇرامىنداعى ۇيىمداردىڭ رەسپۋبليكالىق قارجىنى كەيبىر بيۋدجەتتىك باعدارلامالار بويىنشا قالاي قولدانعانىن تەكسەرۋ ءۇشىن اۋديتورلىق شارالار وتكىزىلدى. ءبىز شىعارعان شەشىم انتيكورعا بەرىلىپ، وسى ىسكە قاتىستى كەيبىر تۇلعالار ۇستالدى. ازىرگە باسقا نارسە ايتا المايمىن، سەبەبى قازىرگى تاڭدا ءىس انتيكوردىڭ باقىلاۋىندا"، - دەيدى ءاليحان سمايىلوۆ.
پالاتا ءتوراعاسى بەكەتايەۆتىڭ ناقتى نە ءۇشىن ۇستالعانىنان بەيحابار ەكەنىن، ءبىراق جوعارى اۋديتورلىق پالاتاسى تەكسەرىس جۇرگىزىپ، قورىتىندىسى انتيكورعا بەرىلگەنى فاكت ەكەنىن اتاپ ءوتتى.
بۇعان دەيىن جوعارى اۋديتورلىق پالاتاسى ادىلەت مينيسترلىگىندە جانە "بولاشاق" كونسالتينگتىك كومپانياسىنا قارسى تەكسەرۋ جۇرگىزگەنىن حابارلاعان بولاتىنبىز. تەكسەرۋ قورىتىندىسى ازىرگە قۇپيا جانە قىلمىستىق ءىس اياسىندا ماتەريالدار تاركىلەندى.
شىلدە ايىندا انتيكور مارات بەكەتايەۆقا قاتىستى تەرگەۋ اياقتالعانىن حابارلادى. ول جەكە كومپانيانىڭ باسشىلىعىمەن بىرگە بيۋدجەت قاراجاتىن اسا ءىرى مولشەردە جىمقىرىپ، الاياقتىق جاسادى جانە كاسىپكەرلىك قىزمەتكە زاڭسىز قاتىستى دەگەن كۇدىككە ءىلىندى.
انتيكور بۇرىنعى ادىلەت ءمينيسترىن 2023 جىلدىڭ 21 قازانىندا ەلدەن قاشىپ كەتپەك بولعان كەزىندە ۇستاعان ەدى.
بەكەتايەۆ 2016-2022 جىلدارى ادىلەت ءمينيسترى بولعان. ول قاندى قاڭتار وقيعاسىنان سوڭ قىزمەتىنەن بوساتىلىپ، كەيىن پرەمەر-مينيستردىڭ كەڭەسشىسى قىزمەتىنە تاعايىندالعان ەدى. ءبىراق ول كەڭەسشى قىزمەتىنەن ءبىر جىلدان كەيىن كەتكەن.
سونىمەن قاتار، DALA INSIDE بايبەككە قاتىستى ەكس ادىلەت ءمينيسترى مارات بەكەتايەۆ تا تەرگەۋشىلەرگە ءبىراز قۇندى اقپارات بەرگەنىن جازعان بولاتىن. قىلمىستىق ءىس قوزعاۋعا تۇرارلىق ءبىرشاما ماتەريال جينالىپ قالدى.
"ءقازىر باۋىرجان بايبەككە قىلمىستىق ءىس قوزعاماق بۇرىن، ونى ەكستراديسيالاۋ مۇمكىن بە، سول جاعى شەشىلۋدە. سەبەبى "جاڭا قازاقستان" ءۇشىن ادامدى سىرتىنان سوتتاۋ جارامايدى"، دەيدى DALA INSIDE دەرەككوزى.
بايبەكتىڭ الماتىداعى بارلىق شەشىمدەرىنە ريەۆيزيا جاسالاتىن بولادى. وعان ريەۆيزيالىق كوميسسيا مۇشەلەرى مەن اۋديتورلار جۇمىلدىرىلادى دەپ جوسپارلانعان.
سوڭعى رەت باۋىرجان بايبەك كيپر مەن گەرمانيادا بوي كورسەتكەن ەدى. نەگىزى ول وتكەن جەلتوقسان ايىندا سولتۇستىك كيپر اۋماعىندا جۇرگەن دەيدى، دەرەككوز. سولتۇستىك كيپر بۇۇ تاراپىنان مويىندالماعان كۆازيمەملەكەت. ءبىراق تۇركيا ارقىلى ەكستراديسيا ماسەلەسىن شەشۋگە بولادى.
ال تاعى ءبىر دەرەككوز باۋىرجان بايبەكتىڭ افريكاعا كوشەيىن دەپ جاتقانىن مالىمدەدى. تانزانيادا كوبالت وندىرىسىنە ينۆەستيسيا سالعان قازاق كاسىپكەرلەرىن جاعالايدى دەگەن اقپارات بار. بيزنەسمەندەر وعان ءسال دە بولسا قولداۋ ءبىلدىرىپ جىبەرۋگە كەت ءارى ەمەس.
