Premer-ministrdiń orynbasary Roman Skliar Qazaqstanda dollar baǵamynyń kúrt kóterilýine qatysty pikir bildirdi. Buǵan deiin dollar baǵamy 550 teńgege deiin kóterilip, sarapshylar muny úkimet basshysy Oljas Bektenovtyń málimdemesimen bailanystyrǵan bolatyn, dep habarlaidy Dalanews.kz.
Eske sala ketsek, Bektenov baspasóz máslihatynda úkimet 2026 jylǵy biýdjettiń boljamyna dollar baǵamyn 540 teńge jáne munai barreliniń baǵasyn 60 dollar shamasynda bekitkenin aitqan edi. Osy málimdemeden keiin ulttyq valiýta birden álsirei bastady.
Úkimettegi baspasóz jiynynda jýrnalist Jániia Ýranqaeva "Premer-ministrdiń málimdemesi úshin úkimet jaýapkershilik arqalai ma" degen saýal qoidy.
"Kelesi jyldyń áleýmettik-ekonomikalyq damý boljamynda 1 AQSh dollarynyń baǵamy anyq kórsetilgen: máselen pessimistik stsenarii boiynsha munaidyń bir barreli 60 dollar bolǵan jaǵdaida 1 AQSh dollary 540 teńge bolmaq. Bul arada ártúrli nusqalar bolýy múmkin. Oljas Bektenov áleýmettik-ekonomikalyq damý boljamyna qatysty sandardy aldynda jariialaǵan bolatyn. Qazirgi jaǵdaiǵa keletin bolsaq, qandai da bir jolmen Úkimet basshysynyń aitqandary osyndai ósimge alyp keldi dep bailanystyra aitý, meniń oiymsha, orynsyz", - dedi aldymen Roman Skliar.
Onyń aitýynsha, Ulttyq bank - memlekettik organdar ierarhiiasyndaǵy jeke qurylym ári ol Úkimetke baǵynbaidy.
"Olar aqsha-nesie saiasatyn qajetti jaǵdaiǵa qarap júrgizedi. Biraq, meniń jáne áriptesterimniń boljamy boiynsha "dollar baǵamy áli de keri ketedi, ol sonshalyqty joǵary bolmaýy tiis". Buǵan deiin de osyndai jaǵdailar bolǵan, naryq aqyrynda turaqtalady. Ulttyq bank te óz tarapynan qajetti sharalardy atqaratynyna senimdimin", – dep sózin qorytyndylady Roman Skliar.
2025 jylǵy 30 shildede Qazaqstanda dollar baǵamy alǵash ret 550 teńge deńgeiinen asyp, QR Ulttyq Bankin valiýtalyq interventsiia júrgizýge májbúr etti. Nátijesinde 1 AQSh dollary 546,36 teńgege deiin tómendedi.
Buǵan deiin saitymyzda "AERC sarapshylary teńge baǵamyna qatysty boljamdy nasharlatý turǵysynda qaita qarady" degen maqala jariialanǵan bolatyn.
