پرەمەر-مينيستردىڭ ورىنباسارى رومان سكليار قازاقستاندا دوللار باعامىنىڭ كۇرت كوتەرىلۋىنە قاتىستى پىكىر ءبىلدىردى. بۇعان دەيىن دوللار باعامى 550 تەڭگەگە دەيىن كوتەرىلىپ، ساراپشىلار مۇنى ۇكىمەت باسشىسى ولجاس بەكتەنوۆتىڭ مالىمدەمەسىمەن بايلانىستىرعان بولاتىن، دەپ حابارلايدى Dalanews.kz.
ەسكە سالا كەتسەك، بەكتەنوۆ باسپا ءسوز ءماسليحاتىندا ۇكىمەت 2026 جىلعى بيۋدجەتتىڭ بولجامىنا دوللار باعامىن 540 تەڭگە جانە مۇناي باررەلىنىڭ باعاسىن 60 دوللار شاماسىندا بەكىتكەنىن ايتقان ەدى. وسى مالىمدەمەدەن كەيىن ۇلتتىق ۆاليۋتا بىردەن السىرەي باستادى.
ۇكىمەتتەگى باسپا ءسوز جيىنىندا جۋرناليست ءجانيا ۋرانقايەۆا "پرەمەر-مينيستردىڭ مالىمدەمەسى ءۇشىن ۇكىمەت جاۋاپكەرشىلىك ارقالاي ما" دەگەن ساۋال قويدى.
"كەلەسى جىلدىڭ الەۋمەتتىك-ەكونوميكالىق دامۋ بولجامىندا 1 اقش دوللارىنىڭ باعامى انىق كورسەتىلگەن: ماسەلەن پەسسيميستىك سەناريي بويىنشا مۇنايدىڭ ءبىر باررەلى 60 دوللار بولعان جاعدايدا 1 اقش دوللارى 540 تەڭگە بولماق. بۇل ارادا ءارتۇرلى نۇسقالار بولۋى مۇمكىن. ولجاس بەكتەنوۆ الەۋمەتتىك-ەكونوميكالىق دامۋ بولجامىنا قاتىستى سانداردى الدىندا جاريالاعان بولاتىن. قازىرگى جاعدايعا كەلەتىن بولساق، قانداي دا ءبىر جولمەن ۇكىمەت باسشىسىنىڭ ايتقاندارى وسىنداي وسىمگە الىپ كەلدى دەپ بايلانىستىرا ايتۋ، مەنىڭ ويىمشا، ورىنسىز"، - دەدى الدىمەن رومان سكليار.
ونىڭ ايتۋىنشا، ۇلتتىق بانك - مەملەكەتتىك ورگاندار يەرارحياسىنداعى جەكە قۇرىلىم ءارى ول ۇكىمەتكە باعىنبايدى.
"ولار اقشا-نەسيە ساياساتىن قاجەتتى جاعدايعا قاراپ جۇرگىزەدى. ءبىراق، مەنىڭ جانە ارىپتەستەرىمنىڭ بولجامى بويىنشا "دوللار باعامى ءالى دە كەرى كەتەدى، ول سونشالىقتى جوعارى بولماۋى ءتيىس". بۇعان دەيىن دە وسىنداي جاعدايلار بولعان، نارىق اقىرىندا تۇراقتالادى. ۇلتتىق بانك تە ءوز تاراپىنان قاجەتتى شارالاردى اتقاراتىنىنا سەنىمدىمىن"، – دەپ ءسوزىن قورىتىندىلادى رومان سكليار.
2025 جىلعى 30 شىلدەدە قازاقستاندا دوللار باعامى العاش رەت 550 تەڭگە دەڭگەيىنەن اسىپ، ق ر ۇلتتىق بانكىن ۆاليۋتالىق ينتەرۆەنسيا جۇرگىزۋگە ءماجبۇر ەتتى. ناتيجەسىندە 1 اقش دوللارى 546،36 تەڭگەگە دەيىن تومەندەدى.
بۇعان دەيىن سايتىمىزدا "AERC ساراپشىلارى تەڭگە باعامىنا قاتىستى بولجامدى ناشارلاتۋ تۇرعىسىندا قايتا قارادى" دەگەن ماقالا جاريالانعان بولاتىن.
