Syrtqy ister ministri orys depýtattarynyń málimdemelerine túsinik berdi
Onyń aitýynsha, depýtat Nikonovtyń málimdemesinen keiin Resei Federatsiiasy elshiliginiń ýaqytsha ókili Syrtqy ister ministrligine shaqyrylǵan, óitkeni elshi ol kezde Máskeýde issaparmen júrgen. Osydan keiin bul málimdeme boiynsha Reseige nota joldandy.
Qoldanystaǵy tájiribege sáikes, olar resmi túrde jaýap bermeidi, biraq ózderi qabyldaǵan sharalar týraly esep beredi. Olar (elshilik) Parlament pen Prezident Ákimshiligine habarlasyp, mundai sózderdi synǵa aldy. Árine, bul sózder meni qazaq, Qazaqstannyń azamaty retinde qatty namysyma tidi. Otanymyzdyń tarihyn biletin adam retinde buǵan men orys tilinde bylai dep jaýap berer edim: "Eto bred sivoi kobyly" (tikelei aýdarmasy - Kók bieniń sandyraǵy). Eń aldymen, tarihqa arqa súieý kerek. Syrtqy ister ministri retinde munyń Resei Federatsiiasynyń resmi ustanymyna sáikes kelmeitindigin aitqym keledi, - dedi Muhtar Tileýberdi Májilistiń jalpy otyrysynda.
Syrtqy ister ministri zańnamalyq deńgeide memlekettik shekara delimitatsiialanǵanyn, zańnamalyq deńgeide Qazaqstan men Resei arasynda ekijaqty kelisimge qol qoiylǵanyn da basa aitty.
Qazir biz memlekettik shekarany belgilep jatyrmyz, pandemiiaǵa bailanysty bul protsess toqtatyldy, sondyqtan biz úsh jyl ishinde demarkatsiiany aiaqtaimyz. Eki memleket arasynda strategiialyq seriktestik qalyptasty. Bul barlyq ekijaqty qujattarda aiqyn kórinis tapqan, sondyqtan biz Resei Federatsiiasymen qatynastarymyzdy halyqaralyq quqyq negizinde damytatyn bolamyz, - dep sózin qorytyndylady ministr.
12 jeltoqsanda QR Syrtqy ister ministrligi Reseige Memlekettik Dýmasynyń depýtaty Viacheslav Nikonovtyń "Qazaqstan territoriiasy - Reseidiń tartý etken keremet syiy" degen málimdemesine bailanysty nota tapsyrdy.
QR Syrtqy ister ministriniń orynbasary Marat Syzdyqov Resei Federatsiiasynyń ýaqytsha senimdi ókili Aleksandr Komarovpen kezdesý kezinde bul málimdemege tań qalysyn bildirdi. Qazaqstannyń Syrtqy ister ministrligi keibir reseilik saiasatkerlerdiń Qazaqstanǵa qatysty jii-jii arandatýshylyq shabýyldary memleketter arasyndaǵy odaqtastyq qatynastarǵa úlken ziian keltirip otyrǵanyn atap ótti.
Nikonovtyń ózi óziniń Telegram-kanalynda "Qazaqstan Respýblikasynyń shekarasyna ainalǵan Qazaq KSR-niń shekaralaryn anyqtaǵanda Qazaqstannyń múddeleri tolyǵymen saqtaldy" dep jazdy jáne ol "Bolshaia igra" baǵdarlamasynda týra osyny aitqysy kelgenin jetkizdi. Ol sondai-aq "baýyrlas Qazaqstan halqyna degen yqylasy ystyq ekenin" bildirdi.
Keiin Memlekettik Dýma Resei Qazaqstannyń egemendigin tolyǵymen moiyndaitynyn, eki el ártúrli saladaǵy dostyq jáne seriktestik bailanystardy jaqtaityndyǵyn, sondyqtan Memlekettik Dýmanyń depýtaty Viacheslav Nikonovtyń málimdemelerine qatysty týyndaǵan yńǵaisyz jaǵdai retteledi dep málimdedi.
