Qazaqstan Respýblikasy Densaýlyq saqtaý ministrligi Almaty qalasyndaǵy Respýblikalyq fizika-matematika mektebi oqýshylarynyń arasynda ishek infektsiiasynyń 48 jaǵdaiynyń tirkelýine bailanysty sanitariialyq-epidemiiaǵa qarsy keshendi is-sharalar uiymdastyrdy. Tamaqtaný blogyna tekserý júrgizilip, sanitariialyq talaptardyń buzylýy anyqtaldy. Bes qaýly shyǵarylyp, shekteý sharalary engizildi jáne dezinfektsiia júrgizildi. Naýqastarmen bailanysta bolǵan adamdar meditsinalyq baqylaýǵa alyndy, dep habarlaidy dalanews.kz.
Sanitariialyq-epidemiologiialyq baqylaý komitetiniń málimetinshe mamandar «Master Food» JShS-niń tamaqtaný blogyn tekserý barysynda azyq-túlik ónimderin saqtaý, daiyn taǵamdardyń táýliktik synamalaryn alý jáne tamaqtanýdy uiymdastyrý talaptarynyń buzylǵanyn anyqtady.
Infektsiia kózin anyqtaý maqsatynda sý men azyq-túlik ónimderinen synamalar, shaiyndylar alynyp, tamaqtaný blogynyń qyzmetkerleri tekserildi. Zerthanalyq zertteýler jalǵasyp jatyr.
Tekserý qorytyndysy boiynsha mektep pen ashananyń qyzmetin toqtata turýdy, jekelegen taǵamdardy satýǵa tyiym salýdy, ýaqytsha sanitariialyq shekteý sharalaryn engizýdi jáne qajetti ilespe qujattary joq sút ónimderin alyp qoiýdy kózdeitin bes qaýly shyǵaryldy.
Internat ǵimaratynda dezinfektsiia júrgizildi. Naýqastarmen bailanysta bolǵan adamdar meditsinalyq baqylaýda. Balalardyń bir bóligi profilaktikalyq maqsatta internatta oqshaýlandy. 14 qazandaǵy jaǵdai boiynsha aýrýdyń 48 jaǵdaiy tirkeldi. Barlyq naýqastar emdeýge jatqyzyldy, olardyń jaǵdaiy turaqty. Reanimatsiialyq kómekti qajet etetin patsientter joq. Tekserý nátijeleri boiynsha materialdar zańnamada belgilengen tártippen qaraý jáne protsestik sheshim qabyldaý úshin quqyq qorǵaý organdaryna jiberildi. Densaýlyq saqtaý ministrligi kásipkerlerge tamaqtanýdy uiymdastyrý kezinde sanitariialyq talaptardy mindetti túrde saqtaý qajettigin eske salady. Bul rette ónimderdi tekserilgen jetkizýshilerden satyp alý, azyq-túlikti saqtaý jáne taǵam daiyndaý sharttaryn saqtaý, qajetti ruqsat qujattarynyń bolýy jáne qyzmetkerlerdiń meditsinalyq qarap-tekserýden ýaqtyly ótýi mańyzdy.
Jaǵdai Qazaqstan Respýblikasy Densaýlyq saqtaý ministrliginiń baqylaýynda. Balalardyń densaýlyǵyn saqtaý, aýrýdyń sebepterin anyqtaý jáne infektsiianyń jańa jaǵdailarynyń aldyn alý maqsatynda epidemiologiialyq tergep-tekserý men qajetti is-sharalar jalǵasýda.
