Búgin, 3 sáýirde OPEK+ monitoring komitetiniń kezdesýi aldynda atalǵan uiymǵa múshe segiz el, sonyń ishinde Qazaqstan men Saýd Arabiiasy kezdesý ótkizetini habarlanǵan. Onyń nátijesi týraly quzyrly ministrlik áli aqparat taratpady. Degenmen onyń shet jaǵasy týraly keibir derekkózderde aqparat paida boldy. Oǵan sáikes, OPEK+ elderi mamyr aiynan bastap munai óndirisi kólemin ulǵaitýǵa ózara kelisken, dep habarlaidy Dalanews.kz.
"Saýd Arabiiasy, Resei, Irak, BAÁ, Kýveit, Qazaqstan, Aljir jáne Oman naryqtyń turaqtylyǵyna adaldyǵyn rastap, munai óndirisin ulǵaitý týraly josparlary baryn málimdedi. Sheshim naryqtaǵy naqty suranysqa qatysty boljamdarǵa negizdelgen", delingen baspasóz habarlamasynda.
"OPEK + elderi mamyr aiynan bastap munai óndirisi kólemin táýligine 411 myń barrelge deiin ulǵaitýǵa kelisti, bul burynǵy jospardan úsh ese kóp. Resei táýligine 9,08 million barrelge deiin, al Saýd Arabiiasy 9,2 million barrelge deiin óndiris kólemin arttyra alady", dep jazady bul rettegi tsifrlardy naqtylaǵan BCC Invest.
Al Qazaqstanǵa qatysty tolyqqandy málimet áli joq.
Buǵan deiin Reuters "OPEK + qatysýshy elderdiń delegattary búgin Qazaqstandy munai óndirisin belgilengen kvotadan asyrýyn doǵarýǵa kóndirýge tyrysady. Óitkeni Qazaqstandaǵy óndiristiń rekordtyq kólemi Saýd Arabiiasyn qosa alǵanda, uiymnyń birneshe múshesiniń qytyǵyna tiiýde", dep jazǵan edi. Rasynda, uiymǵa múshe Aljirden basqasy kvotany asyra paidalanyp jatqany belgili.
Sondai-aq búgin Brent jáne WTI markaly munai fiýchersteri sáikesinshe 5,60% jáne 5,88%-ǵa deiin tómendedi.
"Basqa shikizattardyń da baǵasy quldyrai jóneldi. Atap aitqanda, mystyń, soianyń, maqtanyń, sondai-aq batystyń gazynyń baǵasy da arzandady. Tramptyń jańadan engizgen tarifteri álemdik ekonomikany tejeidi degen paiymǵa súiene otyryp, shikizat naryqtaryndaǵy kóńil-kúi jaǵymsyz sipatta qala bermek", dep naqtylaidy qarjylyq uiym.
Al maýsym aiyndaǵy munai óndirisi kólemine qatysty qorytyndy sheshim 5 mamyrdaǵy kezdesýde qabyldanbaq.
Buǵan deiin saitymyzda "Qazaqstan OPEK+ aldynda munai óndirisi kólemin nege arttyrǵanyn túsindirdi" degen material jariialanǵan bolatyn.
