بۇگىن، 3 ساۋىردە وپەك+ مونيتورينگ كوميتەتىنىڭ كەزدەسۋى الدىندا اتالعان ۇيىمعا مۇشە سەگىز ەل، سونىڭ ىشىندە قازاقستان مەن ساۋد ارابياسى كەزدەسۋ وتكىزەتىنى حابارلانعان. ونىڭ ناتيجەسى تۋرالى قۇزىرلى مينيسترلىك ءالى اقپارات تاراتپادى. دەگەنمەن ونىڭ شەت جاعاسى تۋرالى كەيبىر دەرەككوزدەردە اقپارات پايدا بولدى. وعان سايكەس، وپەك+ ەلدەرى مامىر ايىنان باستاپ مۇناي ءوندىرىسى كولەمىن ۇلعايتۋعا ءوزارا كەلىسكەن، دەپ حابارلايدى Dalanews.kz.
"ساۋد ارابياسى، رەسەي، يراك، ءباا، كۋۆەيت، قازاقستان، الجير جانە ومان نارىقتىڭ تۇراقتىلىعىنا ادالدىعىن راستاپ، مۇناي ءوندىرىسىن ۇلعايتۋ تۋرالى جوسپارلارى بارىن مالىمدەدى. شەشىم نارىقتاعى ناقتى سۇرانىسقا قاتىستى بولجامدارعا نەگىزدەلگەن"، دەلىنگەن باسپا ءسوز حابارلاماسىندا.
"وپەك + ەلدەرى مامىر ايىنان باستاپ مۇناي ءوندىرىسى كولەمىن تاۋلىگىنە 411 مىڭ باررەلگە دەيىن ۇلعايتۋعا كەلىستى، بۇل بۇرىنعى جوسپاردان ءۇش ەسە كوپ. رەسەي تاۋلىگىنە 9،08 ميلليون باررەلگە دەيىن، ال ساۋد ارابياسى 9،2 ميلليون باررەلگە دەيىن ءوندىرىس كولەمىن ارتتىرا الادى"، دەپ جازادى بۇل رەتتەگى سيفرلاردى ناقتىلاعان BCC Invest.
ال قازاقستانعا قاتىستى تولىققاندى مالىمەت ءالى جوق.
بۇعان دەيىن Reuters "وپەك + قاتىسۋشى ەلدەردىڭ دەلەگاتتارى بۇگىن قازاقستاندى مۇناي ءوندىرىسىن بەلگىلەنگەن كۆوتادان اسىرۋىن دوعارۋعا كوندىرۋگە تىرىسادى. ويتكەنى قازاقستانداعى ءوندىرىستىڭ رەكوردتىق كولەمى ساۋد ارابياسىن قوسا العاندا، ۇيىمنىڭ بىرنەشە مۇشەسىنءىڭ قىتىعىنا تيۋدە"، دەپ جازعان ەدى. راسىندا، ۇيىمعا مۇشە الجيردەن باسقاسى كۆوتانى اسىرا پايدالانىپ جاتقانى بەلگىلى.
سونداي-اق بۇگىن Brent جانە WTI ماركالى مۇناي فيۋچەرستەرى سايكەسىنشە 5،60% جانە 5،88%-عا دەيىن تومەندەدى.
"باسقا شيكىزاتتاردىڭ دا باعاسى قۇلدىراي جونەلدى. اتاپ ايتقاندا، مىستىڭ، سويانىڭ، ماقتانىڭ، سونداي-اق باتىستىڭ گازىنىڭ باعاسى دا ارزاندادى. ترامپتىڭ جاڭادان ەنگىزگەن تاريفتەرءى الەمدىك ەكونوميكانى تەجەيدى دەگەن پايىمعا سۇيەنە وتىرىپ، شيكىزات نارىقتارىنداعى كوڭىل-كۇي جاعىمسىز سيپاتتا قالا بەرمەك"، دەپ ناقتىلايدى قارجىلىق ۇيىم.
ال ماۋسىم ايىنداعى مۇناي ءوندىرىسى كولەمىنە قاتىستى قورىتىندى شەشىم 5 مامىرداعى كەزدەسۋدە قابىلدانباق.
بۇعان دەيىن سايتىمىزدا "قازاقستان وپەك+ الدىندا مۇناي ءوندىرىسى كولەمىن نەگە ارتتىرعانىن ءتۇسىندىردى" دەگەن ماتەريال جاريالانعان بولاتىن.
