"Шикізат арзандап жатыр". ОПЕК+ елдері мұнай өндірісі көлемін ұлғайтуға келісті

Кәмшат Тілеухан 03 сәу. 2025 18:54 496

Бүгін, 3 сәуірде ОПЕК+ мониторинг комитетінің кездесуі алдында аталған ұйымға мүше сегіз ел, соның ішінде Қазақстан мен Сауд Арабиясы кездесу өткізетіні хабарланған. Оның нәтижесі туралы құзырлы министрлік әлі ақпарат таратпады. Дегенмен оның шет жағасы туралы кейбір дереккөздерде ақпарат пайда болды. Оған сәйкес, ОПЕК+ елдері мамыр айынан бастап мұнай өндірісі көлемін ұлғайтуға өзара келіскен, деп хабарлайды Dalanews.kz.

"Сауд Арабиясы, Ресей, Ирак, БАӘ, Кувейт, Қазақстан, Алжир және Оман нарықтың тұрақтылығына адалдығын растап, мұнай өндірісін ұлғайту туралы жоспарлары барын мәлімдеді. Шешім нарықтағы нақты сұранысқа қатысты болжамдарға негізделген", делінген баспасөз хабарламасында.

"ОПЕК + елдері мамыр айынан бастап мұнай өндірісі көлемін тәулігіне 411 мың баррельге дейін ұлғайтуға келісті, бұл бұрынғы жоспардан үш есе көп. Ресей тәулігіне 9,08 миллион баррельге дейін, ал Сауд Арабиясы 9,2 миллион баррельге дейін өндіріс көлемін арттыра алады", деп жазады бұл реттегі цифрларды нақтылаған BCC Invest.

Ал Қазақстанға қатысты толыққанды мәлімет әлі жоқ.

Бұған дейін Reuters "ОПЕК + қатысушы елдердің делегаттары бүгін Қазақстанды мұнай өндірісін белгіленген квотадан асыруын доғаруға көндіруге тырысады. Өйткені Қазақстандағы өндірістің рекордтық көлемі Сауд Арабиясын қоса алғанда, ұйымның бірнеше мүшесінің қытығына тиюде", деп жазған еді. Расында, ұйымға мүше Алжирден басқасы квотаны асыра пайдаланып жатқаны белгілі.

Сондай-ақ бүгін Brent және WTI маркалы мұнай фьючерстері сәйкесінше 5,60% және 5,88%-ға дейін төмендеді.

"Басқа шикізаттардың да бағасы құлдырай жөнелді. Атап айтқанда, мыстың, сояның, мақтаның, сондай-ақ батыстың газының бағасы да арзандады. Трамптың жаңадан енгізген тарифтері әлемдік экономиканы тежейді деген пайымға сүйене отырып, шикізат нарықтарындағы көңіл-күй жағымсыз сипатта қала бермек", деп нақтылайды қаржылық ұйым.