ShQO-da zeinetkerler men múmkindigi shekteýli jandar úshin sporttyq nysandarǵa tegin kirý múmkindigi qarastyrylǵan. Osynyń arqasynda egde jastaǵy adamdar dene shynyqtyrýmen ainalysyp, salaýatty ómir saltyn ustanýda. Máselen, Óskemendegi Ústel tennisi ortalyǵy aǵa býyn ókilderi men erekshe jandardyń bas qosatyn súiikti ornyna ainalyp otyr, dep habarlaidy Dalanews.kz Altainews.kz-ke silteme jasap.
– Oblysta 1687 sporttyq nysan bar, olardyń 1166-sy aýyldarda ornalasqan. Zeinetkerlerge jáne múmkindigi shekteýli jandarǵa kirý tegin. Olar bektilgen keste boiynsha keledi. Zeinetkerler arasynda túrli sporttyq saiystar uiymdastyrylyp turady. Qazirgi kezde oblysta 6 dene shynyqtyrý-saýyqtyrý kesheni salynyp jatyr, – deidi sport jáne dene shynyqtyrý basqarmasy basshysynyń orynbasary Serik Qusymbaev.
Óskemendegi Ústel tennisi ortalyǵyna barǵanymyzda egde adamdardyń kóp ekenin kórdik, arasynda múmkindigi shekteýli jandar da bar eken. Elý shaqty adam bir mezette úlken zaldaǵy qaz-qatar ornalasqan ústelderde shiraq qimyldap, bir-birimen tennis oinap jatty.
– Jasym 60-tan asty. Ózim gir kóterý boiynsha sport sheberimin. Ústel tennisi ortalyǵy ashylǵaly beri aptasyna úsh ret osynda kep turamyn, saǵat 11-den 13-ke deiin bolamyn. Eki saǵat ózim úshin jetkilikti. Ulym da osy sportpen ainalysady, men oǵan úlgi kórsetip júrmin. Bizge osyndai jaily jaǵdai jasap otyrǵan oblys basshylyǵyna jáne osy ortalyqtyń qyzmetkerlerine raqmet aitamyn, – deidi sport ardageri Talǵat Jaqypov.
Atap óterligi, qariialar bul jerge dene shiratý úshin ǵana emes, bir-birimen aralasyp, áńgimelesý úshin de jinalyp turady.
Tennis ortalyǵynyń basshysy Denis Jolýdevtiń aitýynsha, nysan 2022 jyly qoldanysqa berilgen. Kúnine munda 500-700 adam keledi, onyń 100 shaqtysy – egde adamdar. Munda ústel tennisimen, badmintonmen ainalysýǵa bolady, dene shynyqtyrýǵa arnalǵan trenajer zaldary da bar.
– Oblysta 169 myńnan astam zeinetker bar. Aǵa býyn ókilderiniń belsendiligin arttyrý, olardy qoǵamdyq-saiasi is-sharalarǵa qatystyrý maqsatynda oblystyq keshendi jospar ázirlenip, iske asýda. Oblystaǵy 3423 zeinetker 167 sporttyq nysanda ornalasqan 274 sektsiiaǵa turaqty ári tegin barady. Atalǵan sektsiialarda olarmen 241 nusqaýshy jumys isteidi, – deidi jumyspen qamtý jáne áleýmettik baǵdarlamalardy úilestirý basqarmasy ardagerlermen jáne múgedektigi bar adamdarmen jumys isteý bóliminiń basshysy Dinara Murathanqyzy.
