Shyǵys Qazaqstan oblysy Buqtyrma men Poganka ózenderinde sý deńgeii kúrt kóterilip, Zýbovsk kentindegi 13 úidiń aýlasyn sý basty,- dep habarlaidy Dalanews.kz
Tótenshe jaǵdaidyń týyndaýyna aimaqtaǵy tolassyz jaýyn-shashyn men taýdaǵy qardyń tez erýi sebep bolǵan. Buqtyrma ózenindegi sý deńgeii syndarly deńgeiden asyp, Poganka ózeninde jer asty sýlary kóterilgen. Nátijesinde 10 turǵyn úi men 3 turǵyn emes nysannyń aýla aýmaqtaryn sý basqan.
Tótenshe jaǵdailar departamentiniń málimetinshe, úilerdiń ishine sý kirmegen. Qutqarýshylar jalpy kólemi 4250 tekshe metr sýdy soryp shyǵarǵan. Sý basýdyń aldyn alý úshin 2000 dana qum salynǵan qap tóselip, bógetterge 980 tonna taý jynysy jetkizilgen. Sonymen qatar, uzyndyǵy 60 metr polietilen úldir drenaj ýchaskesine tóselgen.
1 mamyr kúni aimaqqa arnaiy kelgen oblys ákimi jaǵdaidy baqylap, barlyq jaýapty mekemelerge qaýipti tolyq joiýdy tapsyrdy.
– Sý deńgeii qazirgi tańda 73 sm-ge tómendep, 535 sm-di qurady. Qaýiptiń shegi eńserildi. Halyqty evakýatsiialaý qajet emes. Barlyq qyzmetter úilesimdi ári jedel áreket etip jatyr, – dep jazdy Nurymbet Saqtaǵanov áleýmettik jelidegi paraqshasynda.
Qazirgi ýaqytta sý deńgeiine táýlik boiy monitoring júrgizilýde. Aimaqta jedel shtab qurylyp, bógetti qosymsha nyǵaitý jumystary jalǵasyp jatyr.
