شىعىس قازاقستان وبلىسى بۇقتىرما مەن پوگانكا وزەندەرىندە سۋ دەڭگەيى كۇرت كوتەرىلىپ، زۋبوۆسك كەنتىندەگى 13 ءۇيدىڭ اۋلاسىن سۋ باستى،- دەپ حابارلايدى Dalanews.kz
توتەنشە جاعدايدىڭ تۋىنداۋىنا ايماقتاعى تولاسسىز جاۋىن-شاشىن مەن تاۋداعى قاردىڭ تەز ەرۋى سەبەپ بولعان. بۇقتىرما وزەنىندەگى سۋ دەڭگەيى سىندارلى دەڭگەيدەن اسىپ، پوگانكا وزەنىندە جەر استى سۋلارى كوتەرىلگەن. ناتيجەسىندە 10 تۇرعىن ءۇي مەن 3 تۇرعىن ەمەس نىساننىڭ اۋلا اۋماقتارىن سۋ باسقان.
توتەنشە جاعدايلار دەپارتامەنتىنىڭ مالىمەتىنشە، ۇيلەردىڭ ىشىنە سۋ كىرمەگەن. قۇتقارۋشىلار جالپى كولەمى 4250 تەكشە مەتر سۋدى سورىپ شىعارعان. سۋ باسۋدىڭ الدىن الۋ ءۇشىن 2000 دانا قۇم سالىنعان قاپ توسەلىپ، بوگەتتەرگە 980 توننا تاۋ جىنىسى جەتكىزىلگەن. سونىمەن قاتار، ۇزىندىعى 60 مەتر پوليەتيلەن ءۇلدىر درەناج ۋچاسكەسىنە توسەلگەن.
1 مامىر كۇنى ايماققا ارنايى كەلگەن وبلىس اكىمى جاعدايدى باقىلاپ، بارلىق جاۋاپتى مەكەمەلەرگە ءقاۋىپتى تولىق جويۋدى تاپسىردى.
– سۋ دەڭگەيى قازىرگى تاڭدا 73 سم-گە تومەندەپ، 535 ءسم-دى قۇرادى. ءقاۋىپتىڭ شەگى ەڭسەرىلدى. حالىقتى ەۆاكۋاسيالاۋ قاجەت ەمەس. بارلىق قىزمەتتەر ۇيلەسىمدى ءارى جەدەل ارەكەت ەتىپ جاتىر، – دەپ جازدى نۇرىمبەت ساقتاعانوۆ الەۋمەتتىك جەلىدەگى پاراقشاسىندا.
قازىرگى ۋاقىتتا سۋ دەڭگەيىنە تاۋلىك بويى مونيتورينگ جۇرگىزىلۋدە. ايماقتا جەدەل شتاب قۇرىلىپ، بوگەتتى قوسىمشا نىعايتۋ جۇمىستارى جالعاسىپ جاتىر.
