Shyǵys Qazaqstan oblysynda orman qorynyń órt qaýipsizdigin qamtamasyz etý jumystary jalǵasýda. Jyl basynan beri jalpy aýmaǵy 192,8 gektardy qamtyǵan 14 órt tirkeldi, onyń 5,1 gektary – ormandy jerler. Bul týraly ShQO Tabiǵi resýrstar jáne tabiǵat paidalanýdy retteý basqarmasy basshysynyń orynbasary Merhat Ámirov Óńirlik kommýnikatsiialar qyzmetinde ótken brifingte málimdedi,- dep habarlaidy Dalanews.kz
- Jaz mezgilinde órttiń shyǵý sebepteri ártúrli. Mysaly, Samar jáne Ulan aýdandarynda órttiń basym bóligi naizaǵai saldarynan bolǵan. Al basqa aýdandarda sebep kóbine adam faktory – tabiǵat aiasynda demalý, ot jaǵý kezinde otty durys paidalanbaý, – dedi Merhat Ámirov.
Aýmaqty baqylaý jáne patrýldeý úshin tórt tikushaq jumyldyrylyp, olar 556 saǵat áýede bolǵan. Orman kúzetiniń qaramaǵynda 1 181 qyzmetker, 196 tehnika, úsh myńnan astam jabdyq jáne alty dron bar. Budan bólek, taǵy 26 pilotsyz ushý qurylǵysyn satyp alý josparlanýda. Sondai-aq 29 tonna dizel, 48 tonna benzin qory jasaqtalǵan.
Biyl 62 shaqyrym jańa mineraldy jolaq jyrtylyp, uzyndyǵy 540 shaqyrym burynǵy jolaqtarǵa kútim jasaldy. Sońǵy jeti jylda orman sharýashylyqtarynyń materialdyq-tehnikalyq bazasyn nyǵaitýǵa oblystyq biýdjetten 2,162 mlrd teńge bólingen. Bul qarjyǵa órt sóndirý jáne patrýldik kólikter, traktorlar, shaǵyn órt keshenderi men ózge de jabdyqtar alynǵan.
2025 jyly qosymsha úsh vahtalyq kólik satyp alyndy. Sonymen qatar, «Ónerkásipti damytý qory» AQ arqyly lizingtik negizde taǵy 110 tehnika satyp alý josparlanyp otyr. Onyń jalpy quny – 3,9 mlrd teńge.
Budan bólek, 129 orman kúzeti qyzmetkeri ShQO TJD janyndaǵy Azamattyq qorǵaý akademiiasynda oqytýdan ótti. Aimaqtaǵy orman mekemelerinde táýlik boiy kezekshilik uiymdastyrylǵan.
