شىعىس قازاقستان وبلىسىندا ورمان قورىنىڭ ءورت قاۋىپسىزدىگىن قامتاماسىز ەتۋ جۇمىستارى جالعاسۋدا. جىل باسىنان بەرى جالپى اۋماعى 192،8 گەكتاردى قامتىعان 14 ءورت تىركەلدى، ونىڭ 5،1 گەكتارى – ورماندى جەرلەر. بۇل تۋرالى شقو تابيعي رەسۋرستار جانە تابيعات پايدالانۋدى رەتتەۋ باسقارماسى باسشىسىنىڭ ورىنباسارى مەرحات ءامىروۆ وڭىرلىك كوممۋنيكاسيالار قىزمەتىندە وتكەن بريفينگتە مالىمدەدى،- دەپ حابارلايدى Dalanews.kz

- جاز مەزگىلىندە ءورتتىڭ شىعۋ سەبەپتەرى ءارتۇرلى. مىسالى، سامار جانە ۇلان اۋداندارىندا ءورتتىڭ باسىم بولىگى نايزاعاي سالدارىنان بولعان. ال باسقا اۋدانداردا سەبەپ كوبىنە ادام فاكتورى – تابيعات اياسىندا دەمالۋ، وت جاعۋ كەزىندە وتتى دۇرىس پايدالانباۋ، – دەدى مەرحات ءامىروۆ.

اۋماقتى باقىلاۋ جانە پاترۋلدەۋ ءۇشىن ءتورت تىكۇشاق جۇمىلدىرىلىپ، ولار 556 ساعات اۋەدە بولعان. ورمان كۇزەتىنىڭ قاراماعىندا 1 181 قىزمەتكەر، 196 تەحنيكا، ءۇش مىڭنان استام جابدىق جانە التى درون بار. بۇدان بولەك، تاعى 26 پيلوتسىز ۇشۋ قۇرىلعىسىن ساتىپ الۋ جوسپارلانۋدا. سونداي-اق 29 توننا ديزەل، 48 توننا بەنزين قورى جاساقتالعان.

بيىل 62 شاقىرىم جاڭا مينەرالدى جولاق جىرتىلىپ، ۇزىندىعى 540 شاقىرىم بۇرىنعى جولاقتارعا كۇتىم جاسالدى. سوڭعى جەتى جىلدا ورمان شارۋاشىلىقتارىنىڭ ماتەريالدىق-تەحنيكالىق بازاسىن نىعايتۋعا وبلىستىق بيۋدجەتتەن 2،162 ملرد تەڭگە بولىنگەن. بۇل قارجىعا ءورت ءسوندىرۋ جانە پاترۋلدىك كولىكتەر، تراكتورلار، شاعىن ءورت كەشەندەرى مەن وزگە دە جابدىقتار الىنعان.

2025 جىلى قوسىمشا ءۇش ۆاحتالىق كولىك ساتىپ الىندى. سونىمەن قاتار، «ونەركاسىپتى دامىتۋ قورى» اق ارقىلى ليزينگتىك نەگىزدە تاعى 110 تەحنيكا ساتىپ الۋ جوسپارلانىپ وتىر. ونىڭ جالپى قۇنى – 3،9 ملرد تەڭگە.

بۇدان بولەك، 129 ورمان كۇزەتى قىزمەتكەرى شقو تجد جانىنداعى ازاماتتىق قورعاۋ اكادەمياسىندا وقىتۋدان ءوتتى. ايماقتاعى ورمان مەكەمەلەرىندە تاۋلىك بويى كەزەكشىلىك ۇيىمداستىرىلعان.