Óskemendegi Respýblıka alańynda Jumysshy mamandyqtar jyly aıasynda aýqymdy «Shyǵys mamany» bos jumys oryndary jármeńkesi uıymdastyryldy. Oǵan 2 myńnan astam joǵary oqý oryndary men kolej túlekteri, stýdentter qatysty, dep habarlaıdy Dalanews.kz
Jármeńkege 113 jumys berýshi keldi, onyń ishinde 2000-nan astam jumys ornyn usynǵan iri kásiporyn ókilderi de bar.
Shara uıymdastyrýshysy – SHQO Jumyspen qamtý jáne áleýmettik baǵdarlamalardy úılestirý basqarmasy men Eńbek mobıldiligi ortalyǵy.
"Keńes berý alańdarynda qyzmetkerlerimiz sýbsıdıalanatyn jumys oryndary, «Alǵashqy jumys orny», «Jastar is-tájirıbesi», «Dıplommen aýylǵa» jobalary jaıly túsindirdi. Túrli kompanıalar 2000-nan astam bos jumys oryndaryn usyndy", - dedi Eńbek mobıldiligi ortalyǵynyń dırektory Araılym Esimbekova.
Jármeńkege jumys izdep kelgen túlekterdiń kóbi jumysqa turý úshin is-tájirıbeden ótýge, ıntervú-áńgimege shaqyryldy, keıbireýler birden jumys tapty.
