Brifingte aǵymdaǵy jyly UBT-nyń uiymdastyrylýy men ótkizilýi týraly keńinen aityldy.
– Ulttyq biryńǵai testileý aǵymdaǵy jyldyń 20 maýsymy men 5 shildesi aralyǵynda ótedi. Barlyq sanitarlyq-epidemiologiialyq sharalar qatań saqtalady. Oblysta 16 UBT ótkizý pýnkti daiyndaldy. Onyń ishinde 4 aimaqtyq ýniversitet pen 12 orta mektep bar, – dedi Sairangúl Jumadilova.
Basqarma basshysynyń aitýynsha, aǵymdaǵy jyly UBT-nyń testtik bazasy 30 paiyzǵa jańartylǵan. Suraqtardyń deni logikalyq oilaý, negizgi quzirettilik pen túsiný deńgeiin anyqtaityn fýnktsionaldyq saýattylyqqa baǵyttalǵan.
– UBT-nyń ár núktesinde appeliatsiialyq komissiialar qurylady. Sonymen qatar respýblikalyq appeliatsiialyq komissiia jumys isteitin bolady. Budan bólek oblysta 2338 balany UBT pýnktine deiin tasymaldaý uiymdastyrylady, – dedi Sairangúl Jumadilova.
Brifing barysynda basqarma basshysy biyl Bilim jáne ǵylym ministrligi pedagogikalyq mamandyqtardyń bedelin arttyrý maqsatynda pedagogikalyq mamandyqtar boiynsha shekti balldy 70 deiin kótergeninin atap ótti. Al basqa mamandyqtar boiynsha shekti deńgei 60 balldy quraidy.
Brifingte Ulttyq testileý ortalyǵynyń ShQO boiynsha filialynyń jetekshisi Dinara Meirǵazina biyl UBT tapsyrýshylarǵa kalkýliator paidalanýǵa ruqsat berilgenin atap ótti.
– Beinejazbany qaraý kezinde talapkerlerdiń tyiym salynǵan zattardy paidalanǵany anyqtalsa, onda UBT nátijesi, sonymen qatar bilim berý granty joiylady. Buǵan qosa, taǵy da jańashyldyqtar bar. Buryn testileý ýaqyty 3 saǵat 50 minýt bolsa, qazir 4 saǵatqa deiin uzartyldy, – dedi Dinara Meirǵazina.
Brifing barysynda taýarlar men kórsetiletin qyzmetterdiń sapasy men qaýipsizdigin baqylaý departamentiniń balalar men jasóspirimder arasyndaǵy infektsiialyq emes aýrýlardy baqylaý jáne qadaǵalaý bóliminiń basshysy Baqyt Dyrymbaeva UBT tapsyrýshylardyń dene qyzýy kóterilse, sondai-aq olardan jedel respiratorlyq virýstyq aýrý belgileri anyqtalsa, testileýge kirmeitinin atap ótti. «UBT tapsyrýshylardyń arasynda 2 metr qashyqtyq saqtalýy tiis» dedi Baqyt Dyrymbaeva.
