Shyǵys Qazaqstanda Solovóv aýyldyq okrýginde «Aýyl amanaty» baǵdarlamasy aıasynda shujyq ónimderi, etten jasalǵan jartylaı fabrıkattar jáne konserviler shyǵaratyn seh iske qosyldy, – dep habarlaıdy Dalanews.kz

Jobany Sergeı Býshnev basqaratyn «Altaı Eko» óndiristik kooperatıvi júzege asyrýda. Kooperatıv 60 aı merzimge 28,5 mıllıon teńge kóleminde jeńildetilgen qarjylandyrý alyp, bul qarajat tolyqtaı zamanaýı jabdyqtar satyp alýǵa jumsaldy.

Jabdyqtar 10 naýryzda jetkizilip, aı sońyna deıin ornatyldy. Sehtyń jyldyq óndiristik qýattylyǵy – 360 tonnaǵa deıin shujyq ónimderi men et jartylaı fabrıkattaryn jáne 864 myń bankige deıin et konservilerin shyǵarýǵa múmkindik beredi.

Ónimderdi satý qoldanystaǵy saýda núkteleri arqyly júzege asyrylady. Bul ónimderdi tez ótkizýge jáne jergilikti halyqty sapaly et ónimderimen qamtamasyz etýge jol ashady.

"Bul biz úshin jaı ǵana óndiristi keńeıtý emes – bul turaqtylyqqa, sapaǵa jáne ornyqty damýǵa jasalǵan mańyzdy qadam. Biz naryqqa týǵan jerimizde, jergilikti shıkizattan daıyndalǵan ekologıalyq taza ónim usynǵymyz keledi", – deıdi Kooperatıv basshysy Sergeı Býshnev.

Joba okrýg ekonomıkasy úshin mańyzdy: jańa jumys oryndary ashylady, aýyl sharýashylyǵy ónimderin óńdeý deńgeıi artady, óńirdiń azyq-túlik qaýipsizdigi nyǵaıady.