– Bıyl – Qazaqstan Respýblıkasy Táýelsizdiginiń 30 jyldyǵy. Tarıh kózimen qaraǵanda, az ǵana merzimde jańashyl memleketimizdiń negizi qalandy, qoǵamdyq sana jańǵyrdy, Otanymyz órkendedi. Alǵan asýlarymyz men shyqqan bıikterimizdi Elbasynyń esimimen birge aıtýdyń tarıhı negizi bar. Táýelsizdik jyldarda jalpy halyqtyń ál-aýqaty jaqsardy. Ár óńirde iri jobalar iske asyryldy.
Máselen bizdiń óńirde iri eksporttaýshylarǵa aınalǵan «Kentaý transformator zaýyty», «QazaqBıtým», «Kúıdirilgen kirpish ónimderin shyǵaratyn Bókeı», «Nımeks maqta tazalaý zaýyty», «Maqta óńdeý zaýyty», «Ordabasy qus fabrıkasy», «Qurǵaq túıe untaǵyn shyǵaratyn Golden Camel», «Balyq ónimderiniń óndirisi Hamıt ı K», «DalaFruit» sıaqty kompanıalar quryldy. Bul ekonomıkalyq ósimniń jarqyn kórsetkishi boldy. Budan basqa 300-ge jýyq kásiporyn ashylyp, onda 23 myńǵa jýyq adam jumys atqarýda, – dedi oblys ákimi.
Ómirzaq Shókeev ındýstrıalıalandyrý jyldary (2010-2020 jj.) 140,5 mlrd teńgege 122 joba iske asyrylyp, 7 340 turaqty jumys orny ashylǵanyn atap ótti. Indýstrıalıalandyrý kartasy aıasynda jobalardy iske asyrý buryn ózimizde óndirilmeıtin jáne negizinen eksportqa baǵyttalatyn 12 ónim túri boıynsha óndiristi damytýǵa múmkindik berdi.
– Keńestik zamanda júzege aspaı, armanǵa aınalǵan jobalardy atap aıtsaq, Syrdarıa ózeninen «Táýelsizdik kópiri» salyndy. Bul kópirdiń mańyzdylyǵy – Ózbekstanmen shekaralas ornalasqan Jetisaı jáne Maqtaaral aýdandaryn respýblıkalyq A-15 avtojolymen tikeleı baılanystyrýǵa múmkindik berdi. Buǵan qosa, Jetisaı men Maqtaaral halqyn Shardara sý qoımasy arqyly oblys ortalyǵymen baılanystyratyn «Arnasaı aınalma joly» paıdalanýǵa berildi. Tashkent, Almaty jáne Qyzylorda baǵytynda «Batys Evropa-Batys Qytaı halyqaralyq tranzıttik kólik dálizi» salyndy. Túrkistan oblys ortalyǵyna aınaldy. Bul – Táýelsizdiktiń aıtarlyq bir jemisi dep sanaımyz, – degen óńir basshysy Syrdarıa boıyndaǵy eldi mekenderdi sý tasqynynan qorǵaý úshin «Kóksaraı» sý rettegishi men «Beıneý-Bozoı-SHymkent» gaz magıstralynyń salynýyn da táýelsizdiktiń eń úlken jemisteri dep atady.
